Sýret: astanatv.kz
2021 jyldan beri Qazaqstan Aýǵanstanǵa ondaǵan myń tonna un, azyq-túlik, dári-dármek, turmystyq zat pen jyly kıim jibergen. Sonymen qatar bıyl naýryz aıynda Almatyda Ornyqty damý maqsattary boıynsha Ortalyq Azııa men Aýǵanstan elderine arnalǵan BUU aımaqtyq ortalyǵy ashyldy. Serik Jumanǵarın Abdýl Ǵanı Baradarmen kezdesýde atap ótkendeı, aımaqtyq ortalyqty qurýdaǵy negizgi maqsat – OA elderiniń Aýǵanstanmen áleýmettik-ekonomıkalyq jáne iskerlik yntymaqtastyǵyn jandandyrý. Ortalyq Azııa elderi qazaqstandyq bastamaǵa qoldaý bildirdi.
Qazaqstan Aýǵanstannyń negizgi saýda seriktesteriniń ondyǵyna kiredi. Astyq pen un qazaqstandyq dástúrli taýarlar sanalady. 2024 jyly Aýǵanstan naryǵyna otandyq qant eksportynyń aıtarlyqtaı ósýi baıqaldy – 143 myń tonna. Bul 2023 jylmen salystyrǵanda birneshe ese kóp (19,1 myń tonna). Aýǵanstan naryǵyna kondıterlik jáne un ónimin jetkizý kórsetkishi artyp keledi. Qazaqstan sondaı-aq erte pisetin aýǵan kókónisin elorda bazaryna jetkizýge múddeli.
О́tken jyldyń aıaǵynda eki el taýar aınalymyn 3 mlrd dollarǵa ulǵaıtý jónindegi jol kartasyna qol qoıdy. Aýǵanstan aýmaǵynda túrli paıdaly qazba óndirýdiń orasan zor áleýetin eskere otyryp, ózara ınvestısııanyń málimdelgen kólemine Aýǵanstan ken ornynyń resýrsyn barlaý men óndirý esebinen qol jetkizý josparlanyp otyr. Otandyq bıznes jer qoınaýynyń perspektıvaly ýchaskelerin izdeýge qarajat salýǵa úlken qyzyǵýshylyq bildirip otyr.
14 sáýirde Aýǵanstanǵa Qazaqstannan barǵan geolog-mamandar, ınjenerler toby atalǵan eldiń taý-ken ónerkásibi jáne munaı mınıstrliginiń qoldaýymen birqatar ken ornyn aralady. QR О́nerkásip jáne qurylys vıse-mınıstri Iran Sharhan atap ótkendeı, mamandar Nurstan provınsııasynda berıllıı, qorǵasyn jáne myrysh tabylyp otyrǵan ken oryndarynan 130 kılo ken synamasyn aldy. Endi zerthanada neǵurlym egjeı-tegjeıli taldaý úshin synamalar Qazaqstanǵa jiberiledi. Nátıje alynǵannan keıin qazaqstandyq tarap ken ornyn odan ári ıgerý úshin neǵurlym aýqymdy kelissóz formatyna kirisýge daıyn.
Jol kartasynda belgilengen is-sharalardy jandandyrý úshin Serik Jumanǵarın Aýǵanstan Premer-mınıstriniń orynbasaryna Qazaqstannyń Kabýldaǵy saýda úıin ashýdy usyndy. Abdýl Ǵanı Baradar bul usynysty qoldap, aýǵan tarapy da Qazaqstanda óziniń saýda bazaryn ashqysy keletinin atap ótti. Sondaı-aq Qazaqstan tarapynan Aýǵanstanǵa «QazTehna» JShS óndiretin otandyq avtobýstardy jetkizý múmkindigin qarastyrý usynyldy. Jańa saýda úıleri yntymaqtastyqtyń ártúrli baǵyttary boıynsha ózara ınvestısııalardy jandandyrýǵa yqpal etedi.
Sonymen qatar S.Jumanǵarın Aýǵanstannyń baılanys jáne aqparattyq tehnologııalar mınıstri Nadjıbýlla Hakkanımen kezdesti. Ol otandyq kompanııalar Aýǵanstandaǵy ınfraqurylymdyq jáne telekommýnıkasııalyq jobalardyń qurylysyna qatysýǵa qyzyǵýshylyq tanytyp otyrǵanyn atap ótti. Týrgýndı – Gerat jańa temirjol telimin salý kezinde optıkalyq kabel tóseý jumysyna birlesip qatysýdy usyndy. Saýda jáne ónerkásip mınıstri Nurıddın Azızımen kezdesýde eki eldiń ózara taýar aınalymyn ártaraptandyrý múmkindigi talqylandy.
