Týǵan eliniń joǵyn joqtap, rýhyn kóterý jolynda ter tókti. Qalamynan týǵan alǵashqy shyǵarmalarynan bastap keıingi týyndylaryna deıin ózekti taqyrypty kóterdi. Ult minezin, áleýmet máselelerin tereń tolǵaǵan eńbekteri birneshe býynnyń rýhanı jan azyǵy retinde sana-sezimine qozǵaý saldy. Ult rýhanııatyn jetildirdi.
Ákim Tarazı alǵashqy eńbegi «Quıryqty juldyz» povesiniń ózimen-aq ádebıet aýylyna ımenbeı engenin oqyrman jaqsy biledi. Odan beride tynymsyz eńbek pen asqan qarym-qabilet arqasynda «Úlken aýyl» (1968), «Asý-asý» (1970), «Kókjıek» (1980), «Basynan Qarataýdyń» (1984) povest-áńgimeleri ult ádebıetiniń qorjynyn eseleı tústi. «Bultqa salǵan uıasyn» atty tuńǵysh romany joǵary baǵalanyp, oqyrmannyń kóńilinen shyqty. «Tasjarǵan», «Ken», «Jaza», «Sher», «Mahabbat jyry», «Qııanat» syndy romandary qazaq ádebıetiniń shoqtyqty shyǵarmalary qataryna qosyldy. Altyn qorda saqtalǵan «Tulpardyń izi», «Arman ataman», «Qarash-qarash», «Mustafa Shoqaı» syndy kınotýyndy ssenarııleriniń avtory Ákim Tarazıdiń júrip ótken joly – ulttyń kósheli muratyn túgendegen qyrýar eńbek pen ótelgen boryshtyń joly.
Dúnıede ádebıettiń dańǵyl bozy, ultynyń ulyqty uly ataný – tańdaýly tulǵalardyń enshisine jazylǵan baq. Yldıdan shapsa tóske ozǵan otanshyl tulǵa qalamymen ǵana emes, bolmys-bitimimen qoǵamdyq jıyndarda da qaıratkerlik qyrynan tanylǵanyn bilemiz. Keńes júıesin silkip alǵan Jeltoqsanda da bılikti mysymen jasqaǵan tulǵanyń rýhy peıishte shalqysyn.
«Egemen Qazaqstan» qalamgerleri
