Ol alǵashqy áńgimeler jınaǵy «Aqberdiń aýlasynan» bastap qazaq ádebıetiniń kórnekti ókili bola bildi. Onyń qalamynan týǵan birneshe roman men povest, áńgimeler qazaq oqyrmandarynyń súıikti shyǵarmalaryna aınaldy. Biz, Ákim aǵanyń sońynan ergen inileri, jazýshynyń jazý stıline tánti bolatynbyz. Pesa, ssenarıı jazýdy qanshama qazaq jazýshylary osy kisiden úırengeni aqıqat.
Qazaqtyń taǵy bir kórnekti jazýshysy Qalıhan Ysqaqovpen birlesip qanshama kınossenarııdi dúnıege ákeldi deseńizshi. Ol keıingi inilerge ólsheýsiz qamqorlyq jasap, meıirimdi aǵa bola bildi.
Ol basshylyq qyzmette de asyp-saspaıtyn baısaldylyǵymen, keńqoltyq meıirimdiligimen erekshelenetin.
Onyń Qazaqstan Jazýshylar odaǵy men kınogerler odaǵyna sińirgen eńbegi ushan-teńiz. «Qazaqfılm» kınostýdııasynyń qalyptasýyna, ósip-órkendeýine sińirgen eńbegi bir tóbe.
Qazaqtyń kemeńger, birtýar uly Ákim Tarazısiz qazaq ádebıetin kózge elestetý múmkin emes.
Jatqan jerińiz jaryq bolsyn, asyl aǵa!
Mereke QULKENOV,
Qazaqstan Jazýshylar odaǵynyń basqarma tóraǵasy
