Foto: Mádenıet jáne aqparat mınıstrliginiń resmı saıty
San qyrly talant ıeleriniń negizgi bir qyry alǵa tartylyp, basqa jaqtary kómeskilenip ketetin kezder de bolady. Sondyqtan jan aýyryp jazyp otyrǵan myna qysqa qaıyrym azasózde Tarazıdiń prozasyndaǵy stıl tazalyǵy, oı tereńdigi, sýret beıneliligi, sezim shynaıylyǵy onyń teatr dramatýrgııasynda, kınossenarıılerinde jańasha jarqyraǵanyn aıryqsha aıtqymyz keledi. Ákim Tarazıdiń qazasyna oraı keshe «Tengrinews» «avtor ssenarııa klassıcheskogo fılma Majıta Begalına «Sledy ýhodıat za gorızont» dep jazypty. Artyq-kemi joq. Solaı. Ákim aǵanyń qolynan shyqqan «Qarash-Qarash» fılminiń ssenarııi jóninde de osylaı desek, artyq-kemi joq. Qalamgerdiń bul qyrymen elý jyldan astam ýaqyt boıy jaqyn tanys adam retinde muny senimmen aıta alamyn. 1974 jyly Memlekettik kıno komıtetinde derekti fılmder redaktory qyzmetin atqarǵanymyzda Ákim aǵa Qazaqstan kınematografıster odaǵy basqarmasynyń birinshi hatshysy bolatyn. Jumys babymen aralasyp qalǵanymyzda aǵamyzdyń qandaı qıyn túıindi de salqyn sabyrǵa salyp sheshe beretinin talaı kórgenbiz, ishki mádenıetine talaı súısingenbiz. Qalamgerlik pen qaıratkerlikti qatar alyp júrýdiń úırenerlik úzdik úlgisin izdesek te, Ákim Tarazıdiń ómiri men ónerinen birdeı tabamyz.
Ortamyzdy oısyratyp ótken qazanyń tusynda asyl aǵanyń tamasha taǵylymynan ónege alatyn óner ıeleri shyǵa beredi dep kóńil demdeımiz.
Saýytbek ABDRAHMANOV,
memleket jáne qoǵam qaıratkeri
