Sýret: facebook.com/nabrk.kz
Ákim aǵamen kıno salasynda kóp jyl boıy áriptes boldyq. Aǵa basshy, biz qosshy retinde qyzmet atqarystyq. Aldyn kórdik. Kisiligin tanydyq. Kem soqqanyn kórgenimiz joq.
Ádebıet maıdanynda da jazýshy Ákim Tarazıdiń talantyna tym erteden tánti boldyq. Onyń ádebıettegi tuńǵysh kitaby «Quıryqty juldyzǵa» resenzııa jazdyq. Ádebıet atty alyp aıdynǵa eshkimge uqsamaıtyn erek mánerli, óz dúnıetanymy bar úlken jazýshynyń kelgenin pash ettik. Olqy túsken jeri bolmady. Ár eńbegimen oqyrman úmitin aqtady. El tanymyn, ult rýhanııatyn jańa kókjıekter men keńistikterge jeteledi. Kóp uzamaı ómirge san salaly, salmaqty, tek Tarazı ǵana jaza alatyn, tek Tarazı bolmysynan týǵan roman «Tasjarǵan» keldi. Zatyn aty áıgilep tur.
Osy kitap qolǵa tıisimen qalt etpeı qadalyp oqyǵanym este. О́ıtkeni Ákim kórgen keńestik shyndyq romanda sosrealızm talabyna syımaıtyn tarpań shyndyq bolyp shyqqan eken. Tarazı talanty keńestik shyndyqqa degen osynaý synshyl qalamger qalybynan taımady. Sahna úshin jazsa da. Ekran úshin jazsa da. Halqyn qaltqysyz súıdi.
Qalamgerdiń qazaq úshin kúresi, ásirese «Andreı» atty derekti ocherkinde, tipten ashyq atoılap kórindi. Kúreskerlik tulǵasy tý kóterdi. О́lmes murattardy bıik ustap ótti.
Tarazı tulǵa 92 jyl soqqan júregimen ultqa qyzmet etýdiń eren úlgisin kórsetti. Ádemi, abyroıly qartaıdy. Alla panasyna alsyn. O dúnıede júzi jarqyn bolary haq.
Rýhy Alla aldynda shat bolyp, turaǵy peıish baqtan buıyrsyn!
Smaǵul ELÝBAI,
Qazaqstannyń halyq jazýshysy
