Sýret: adebiportal.kz
Bul kóshke ileskender qazaq ádebıetiniń qorjynyna ulan-ǵaıyr olja saldy. Sonyń biri – endi máńgilikke aınalǵan Tarazı qalamynan týyndaǵan shyǵarmalar.
Jas kúnimizde qalamdas dostar bir-birimizdi is-áreketimizge oraı tanymal qalamgerlerdiń tatymdy týyndylaryna telip ataý úrdiske engen bolatyn. Bul – Tarazı týyndylarynyń sahna tórinde mazdap janyp, kórermen kókiregin jylytyp turǵan shaǵy edi. Bireýler «Joly bolǵysh jigit» atansa, bireýler «Jaqsy kisi», al endi bireýler «Laıner» degen atqa ıe bolyp shalqyp júrdi. Biz osylaısha qalamger keıipkerlerin ómirden izdep tabatynbyz. Jazýshynyń teatr men kınodramatýrgııa salasyndaǵy eńbegi orasan. Ol uzaq sóz.
Á.Tarazı Mustafa Shoqaı taqyrybyna batyl qalam tartty. Túrkistan birligi dep ótken azamattyń beınesin kemeldengen sosıalızm kezeńinde shynaıy beınelep, erlik kórsetti. Alǵash degennen shyǵady, F.Rableniń «Gargantıýa jáne Pantagrıýel» romanyn da alǵash qazaq tilinde sóıletti.
Áýeli Saıyn ózi jazǵan «Arǵy-bergi jolmen» máńgilikke attansa, Qalıhan «Qońyr kúzde» qol bulǵap ketti. «Ertistiń muhıtqa quıǵanyn» sýrettep, Ramazan da sońdarynan ilesti. «Sońǵy kóshti» shyǵaryp salǵan Qabdesh te sońdarynan jol tartty. Endi topyraqqa «Tulpardyń izin» qaldyryp, Ákim aǵa da attanyp barady. Ol da aıtýly kóshtiń aqyry bolyp úıirge baryp qosylar. Onda da ádebıet degen álem áńgime bolmaı qalmas. О́ıtkeni ádebıetti jetildirgen ózderi emes pe?
Qýandyq TÚMENBAI,
«Aıboz» ulttyq ádebı syılyǵynyń laýreaty
