Bul mereke Memleket basshysynyń qoǵamda oqý mádenıetin qalyptastyrý maqsatynda úshinshi Ulttyq quryltaıdyń negizgi sessııasynda bergen tapsyrmasyna baılanysty belgilendi.
Jańa mereke kúnin engizý týraly Úkimet qaýlysy 2024 jylǵy 16 shildede kúshine endi.
Memleket basshysy qoǵamda kitap oqýdyń joǵary mádenıetin damytýdyń jáne qazaqstandyqtar arasynda ádebıetti nasıhattaýdyń mańyzdylyǵyn birneshe ret atap ótti.
«Shyndyǵynda, kitap oqıtyn halyq qana zııaly bola alady. Biz óskeleń urpaqtyń kitap oqýǵa degen qyzyǵýshylyǵyn oıatýymyz kerek. Bul, ásirese, áleýmettik jeliler zamanynda óte qıyn ekenin túsinemin. Biraq biz bul máseleni sheshýimiz kerek. Basqa jol joq», degen edi Qasym-Jomart Toqaev Túrkistanda ótken Ulttyq quryltaıdyń ekinshi otyrysynda (2023 jyl).
Prezıdent sondaı-aq Qazaqstan naryǵyndaǵy kórkem ádebıettiń 90 paıyzǵa jýyǵy shetelden keletinine alańdaýshylyq bildirdi.
«Elimizdiń ereksheligin kórsetetin, ulttyq múddemizge saı keletin kitaptardy barynsha kóp basyp shyǵarý óte mańyzdy. Biz smartfonnyń balaǵa arnalǵan kitapty almastyrýyna jol bere almaımyz. Búgingi tańda elimizdiń mektep kitaphanalarynda 130 mıllıon kitap bar. Degenmen, olardyń arasynda kórkem ádebıettiń úlesi mardymsyz», dedi Prezıdent.
Osy oraıda Memleket basshysy «Balalar kitaphanasy» baǵdarlamasyn júzege asyrýdy, qazaq ádebıetiniń balalarǵa arnalǵan túrli kezeń men janrlardy qamtıtyn shyǵarmalarynyń tizimin qalyptastyryp, qoljetimdi etýdi tapsyrdy.
