Aıta keteıik, bıyl Qazaqstanda alǵash ret atalyp ótip jatqan Ulttyq kitap kúni – Memleket basshysy Qasym-Jomart Toqaevtyń tapsyrmasymen belgilengen mereke. Prezıdent bul bastamany Atyraýda ótken Ulttyq quryltaı otyrysynda kóterip, ony bilim men kitap oqýǵa degen súıispenshilikti arttyrý maqsatynda usynǵan bolatyn.
Osy mereke aıasynda uıymdastyrylǵan «Ulttyq kitap» baıqaýynda otandyq jazýshylar, kitap baspashylary, ıllıýstratorlar men aýdarmashylar 10 atalym boıynsha marapattaldy. Bas júlde – «Jyl kitaby» gran-prıin «Qazaqstannyń tarıhı tulǵalary» serııasy úshin «Almaty kitap» baspasynyń prezıdenti Gaýhar Saımasaeva ıelendi.
Saltanatty jıynda Erlan Qoshanov kórnekti jazýshy, ádebıet maıtalmany Ákim Tarazıdy eske alyp, marqumnyń rýhyna qurmet bildirdi. Sonymen qatar ol kitaptyń adamzat órkenıetindegi mańyzyna toqtalyp, qazirgi aqparattyq zamanda da onyń róli báseńdemeıtinin atap ótti.
«San ǵasyrlar ótse de, kitaptyń adamzat úshin mańyzy ózgergen joq. Búginde kitap – zııatker ult pen sanaly qoǵam qalyptastyrýdyń negizgi quralyna aınaldy. Qazirgi tańda qoldanyp júrgen barlyq tehnologııa, medısına, óner – bári de kitap oqý arqyly damyǵan. Sondyqtan Memleket basshysy aıtqandaı, kitap ulttyń rýhanı qundylyǵyna aınalýy tıis. Ulttyq kitap kúnin atap ótýdiń basty maqsaty – osy», dedi Májilis spıkeri.
Ol óz sózinde kitap shyǵarý salasyndaǵy ózekti máselelerge de nazar aýdardy. Atap aıtqanda, syrtqy naryqqa táýeldilik, qazaq tilindegi ádebıettiń azdyǵy jáne basqa da túıtkilderge toqtalyp ótti.
«Prezıdent Ulttyq quryltaıda ıdeologııa salasyndaǵy basty baǵyttardyń biri – kitap shyǵarý ekenin basa aıtty. Qazirgi tańda memleket bul baǵytqa erekshe kóńil bólip otyr. Mysaly, Parlamentte qyzý talqylanyp jatqan jańa Salyq kodeksi jobasynda depýtattar otandyq kitap baspalaryn qosylǵan qun salyǵynan bosatý jóninde usynys engizdi. Bul máselede Úkimetpen ortaq sheshimge kelemiz dep úmittenemiz» dedi Erlan Qoshanov.
Sondaı-aq, Memleket basshysynyń qoldaýymen elimizde kitaphanalar júıesi jańǵyrtylyp jatqany, kitaphanashylardyń jalaqysy kóterilgeni jáne sıfrlyq kitaphanalardyń damyp kele jatqany aıtyldy. Búgingi tańda elimizde 4 myńǵa jýyq kitaphana jumys isteıdi. Olardyń 5 mıllıonnan asa turaqty paıdalanýshysy bar, sonyń besten biri – balalar.
«AMANAT» partııasynyń jetekshisi retinde Erlan Qoshanov «KITAP – AMANAT» partııalyq jobasynyń mańyzdylyǵyna da toqtaldy. Bul joba otandyq ádebıetti keńinen nasıhattaýǵa baǵyttalǵan. Qazirgi tańda joba aıasynda elimizdiń barlyq óńirlerinde partııa fılıaldary janynan 24 ortalyq ashylǵan. Onda túrli kitap kórmeleri, avtorlarmen kezdesýler jáne ózge de mádenı is-sharalar uıymdastyrylyp jatyr.
Marapattaý rásimine Mádenıet jáne aqparat mınıstri Aıda Balaeva, mádenıet jáne óner qaıratkerleri, qoǵam belsendileri men Parlament depýtattary qatysty.
