Kompanııa 2018 jyldan beri «Jasyl ekonomıka» talaptaryna saı ekologııalyq baǵdarlama ázirlep, ony kezeń-kezeńimen júzege asyryp keledi. Osy joly kenishtiń daıyn ónimderdi saqtaıtyn qoımasy men Rýdnyı qalasynyń aralyǵyna 1000 túp kóshet egildi.
«Tal egip, kóshet otyrǵyzý birazdan beri qalyptasqan dástúrimizge aınaldy. Mundaı aksııalar jyl saıyn uıymdastyrylady. О́tken jyly 17 myńnan asa, bıyl 14 myń aǵash otyrǵyzdyq. Búgin taǵy 1 myń kóshet ektik. Qorshaǵan ortany kógaldandyrý «ERG» kompanııasynyń uzaqmerzimdi ekologııalyq strategııasyna negizdelgen», deıdi SSKО́B bas ekologi Anatolıı Dvornıchenko.
Senbilikke qatysqan kolledj stýdentteriniń deni oqýyn támamdaǵan soń, atalǵan kenishke jumysqa ornalaspaq. Birlestik ekologteri, merdiger mekemelerdiń qyzmetkerleri, erikti stýdentter bar sharýany bir saǵatqa jeter-jetpes ýaqytta tyndyryp tastady.
«Biz kásiporyn aımaǵyn jyl saıyn kógaldandyryp otyramyz. Ekojúıeni, aýanyń tazalyǵyn jaqsartýǵa tyrysamyz. О́nerkásiptiń qorshaǵan ortaǵa keri áser etetinin joqqa shyǵarýǵa bolmaıdy. Alaıda bul áserdi azaıtý, aýa quramyndaǵy zııandy elementterdi joıý baǵytynda keshendi is-sharalar atqarylady. Aınalany kógaldandyrý – sol kóp ádistiń biri ǵana», deıdi kásiporynnyń ekologııa jónindegi sarapshysy Igor Gontarenko.
Jas tal tamyry tereńge boılap, japyraǵy jaıqalǵansha kásiporyn ekologteriniń kútiminde bolady. Ekolog-mamandardyń aıtýynsha, ótken jyly otyrǵyzylǵan 17 myń kóshettiń 80%-dan astamy tamyr jaıyp úlgergen. Qýrap qalǵan aǵashtardyń ornyna bıyl jańa kóshetter egilgen.
Qostanaı oblysy
