Adaldyq – adamnyń ishki ózegin qalyptastyratyn qasıet qana emes, qoǵam damýynyń basty qozǵaýshy kúshi. Prezıdent Qasym-Jomart Toqaev ótken jáne bıylǵy Ulttyq quryltaıda osy ózekti máselege basa mán berip, jastar tárbıesine qatysty naqty baǵyt-baǵdardy aıqyndap berdi.
Memleket basshysynyń tapsyrmasyna sáıkes, 2023 jyldan bastap elimizdiń ár óńirinde Qazaqstan halqy Assambleıasy janynan Aqsaqaldar keńesi quryldy. Bul – ulttyq birlik pen qoǵamdyq kelisimdi nyǵaıtýǵa, sonymen qatar jastarǵa rýhanı-adamgershilik tárbıe berýge baǵyttalǵan mańyzdy qadam boldy. Qazir respýblıkada 1 260 Aqsaqaldar keńesi jumys istep tur. Quramynda 7 500-den asa azamat bar.
Máselen, Qostanaı oblysynda keńes 2023 jyldyń 19 qańtarynda qurylyp, oǵan zııaly qaýym ókilderi men túrli etnostan 22 azamat endi. Al oblys kóleminde keńes músheleriniń jalpy sany 300-den asady.
Keńes josparyna saı otyzdan asa baǵyt qamtylyp, halyqpen tikeleı jumys júrgizilip jatyr. Negizgi baǵyttyń biri – «Adal azamat» jobasy. Bul – Memleket basshysynyń ádiletti qoǵam qurý ıdeıasyn júzege asyrýǵa negizdelgen. Maqsat – joǵary adamgershilik qasıetterge ıe, azamattyq jaýapkershiligi zor, eńbekke adal, birlik pen zańdylyqty qadirleıtin tulǵalardy tárbıeleý.
QHA «Adal azamat» qoǵamdyq jobasyn belsendi iske asyrý jáne jalpyulttyq qundylyqty ilgeriletý úshin Aqsaqaldar keńesi bazasynda aqparattyq-túsindirý tobyn qurdy. Arnaıy ádistemelik usynymdar ázirlenip, óńirde ár salada eńbek etken aqsaqaldar men zııaly qaýym ókilderiniń qatysýymen keń aýqymdy nasıhat jumystary júrip jatyr.
Uıymdastyrylatyn dárister – sanany tárbıeleıtin taǵylymdy kezdesýler. Olar Abaı Qunanbaıuly, Shákárim Qudaıberdiuly, Baýyrjan Momyshuly atamyzdyń, ál-Farabı sekildi uly oıshyldardyń danalyq sózderi men Memleket basshysynyń Ulttyq quryltaıda júktegen tapsyrmalaryna negizdelip ótedi. Jastarǵa adaldyqtyń máni men ádildiktiń kúndelikti ómirdegi kórinisi, shynaıy patrıotızm uǵymy túsindiriledi.
Máselen, 10 sáýirde elimizdiń túkpir-túkpirinde «Aqsaqal taǵylymy» atty keń kólemdi is-shara uıymdastyrylyp, dárister ótkizildi. Bastama arqyly Aqsaqaldar keńesi etnosaralyq kelisim men beıbit ómir qundylyǵyn nasıhattaýǵa tyrysty. Odan bólek, bıyl halyqtyń problemalyq máselelerin qaraý jáne olardy sheshý jóninde usynystar ázirleý úshin memlekettik organdar men azamattyq qoǵam ınstıtýttarynyń qatysýymen «Danalyq kópiri» ınteraktıvti kezdesýleri uıymdastyryldy. Máselen, Qostanaı qalasyndaǵy kezdesýde oblys turǵyndarynan 20-dan asa suraq kelip tústi. Kóterilgen ózekti máseleler ýaqtyly sheshilýi úshin jergilikti jaýapty organdarǵa jiberildi.
Byltyrǵy QHA sessııasynda Prezıdent Assambleıanyń qoǵamdaǵy nashaqorlyq, qumar oıyndarǵa táýeldilik, turmystyq zorlyq-zombylyq, vandalızm men ysyrapshyldyq sııaqty áleýmettik máselelermen kúresýdegi rólin erekshe atap ótti. Sondaı-aq Qasym-Jomart Toqaev balalar men jastardy qorǵaý – búkil qoǵamnyń jaýapkershiligi ekenin basa aıtty.
Búginde oblystyq Analar keńesimen birlese osy bes áleýmettik keseldiń aldyn alýǵa baǵyttalǵan taqyryptyq dárister, tárbıe saǵattaryn ótkizip turýdy qolǵa aldyq.
Keıingi ýaqytta qoǵamda «Adal azamat» jobasynyń áserin baıqap júrmiz. О́ńirlerde jastar óz erkimen volonterlik qozǵalystarǵa qatysyp, áleýmettik jobalardy iske asyryp, ekologııalyq senbilikter men qaıyrymdylyq aksııalaryn uıymdastyrady. Bul olardyń qoǵam ómirine enjar qaramaıtynyn, jaýapkershilik júgin sezine bastaǵanyn kórsetedi. Iаǵnı jastar tek tyńdaýshy emes, naǵyz bastamashyl, ıdeıa usynýshy, áreket etýshi azamatqa birtindep aınalyp jatyr.
Aıta ketý kerek, jaqynda Qostanaıda alǵash ret aqsaqaldarǵa arnalǵan semınar-trenıng ótti. Is-sharada aqsaqaldar «Adal azamat» jobasynyń mazmunymen tereń tanysyp, ádistemelik materıaldar aldy. Endi olar óz aımaqtarynda jastarmen etene jumys istep, jobanyń qundylyqtaryn nasıhattaýǵa kirisedi.
Qalqaman JAQYP,
Qostanaı oblysyndaǵy Aqsaqaldar keńesiniń tóraǵasy
