Máýlen Áshimbaev meımanǵa iltıpat bildire kelip, Horvatııa Qazaqstannyń Eýropalyq odaqtaǵy senimdi seriktesi ekenin aıtty.
Sondaı-aq palata spıkeri parlamentaralyq baılanystardy odan ári nyǵaıtýdyń mańyzdy ekenin atap ótti. Suhbat kezinde zań shyǵarý qyzmetinde tájirıbe almasý, dostyq toptaryna múshe depýtattardyń ózara saparlaryn uıymdastyrý jáne Parlament Senaty men Sabordyń salalyq komıtetteri arasynda tyǵyz baılanys ornatý jónindegi jumystarǵa basa mán berildi.
«Qazaqstan men Horvatııa arasynda tıimdi saıası dıalog jolǵa qoıylǵan. Ekonomıkalyq yntymaqtastyq pen mádenı baılanystar da qarqyndy damyp keledi. Sizdiń saparyńyzdyń mazmuny men mańyzy elderimiz ózara is-qımyldy odan ári tereńdetýge múddeli ekenin kórsetedi. Memleketterimiz arasyndaǵy yntymaqtastyqty nyǵaıtý jolynda parlamentaralyq dıalog úlken ról atqarady. Biz Horvatııa Parlamentimen qarym-qatynasty damytýǵa nıettimiz. Bul rette dostyq toptarynyń áleýetin ózara dıalogti damytýdyń tıimdi tetigi retinde paıdalanǵan oryndy dep esepteımiz», dedi M.Áshimbaev.
Kezdesýde saýda-ekonomıkalyq jáne ınvestısııalyq yntymaqtastyqty nyǵaıtý máseleleri de talqylandy. Senat tóraǵasy el Prezıdenti Qasym-Jomart Toqaevtyń bastamasymen Qazaqstanda iske asyrylyp jatqan áleýmettik-ekonomıkalyq jáne saıası reformalarǵa toqtalyp, qolǵa alǵan jumys negizgi memlekettik ınstıtýttardy keshendi túrde jańǵyrtýdy kózdeıtinin tilge tıek etti.
Naqty aıtqanda, suhbat barysynda jańa ekonomıkalyq úlgi qalyptastyrýǵa jáne Qazaqstannyń ınvestısııalyq ahýalyn jaqsartýǵa arnalǵan sharalar týraly, sondaı-aq eki tarap ta múddeli salalarda ınvestorlar úshin artyqshylyqtar qarastyrý jóninde sóz boldy. Osyǵan baılanysty energetıka, farmasevtıka, kólik, aqparattyq tehnologııalar jáne aýyl sharýashylyǵy sııaqty baǵyttardaǵy birlesken jobalarǵa erekshe nazar aýdaryldy.
О́z kezeginde Gordan Grlıch-Radman Qasym-Jomart Toqaevtyń basshylyǵymen Qazaqstanda júzege asyrylyp jatqan aýqymdy saıası jáne áleýmettik-ekonomıkalyq ózgeristerge joǵary baǵa berdi. Sondaı-aq ol yntymaqtastyqty odan ári keńeıtýge jáne nyǵaıtýǵa múddeli ekenin jetkizdi.
Sonymen qatar Senat tóraǵasy bıyl qyrkúıek aıynda ótetin «Dinder dıalogi – bolashaq jolyndaǵy sınergııa» taqyrybyna arnalǵan Álemdik jáne dástúrli dinder kóshbasshylarynyń VIII sezine daıyndyq barysynda qolǵa alynǵan jumystarǵa toqtalyp ótti.
