Maqsat – táýelsizdikti máńgilik etý

Qazaqstan Respýblıkasynyń Tuńǵysh Prezıdenti N.Á.Nazar­baevtyń Táýelsizdik kúnine arnalǵan saltanatty jıynda sóılegen sózi júreginen tógile shyqty. Júrekten shyqqan sóz júrekke jetti. Iá, Táýelsizdik bizge eshqandaı kókten túsken qudirettiń syıy emes hám azattyq joly – azapty. Al ony saqtap qalýdyń odan da beter qaýip-qaterli ekenin qazirgi álemdik damýdyń ózi kórsetip otyr. Tamyljyǵan tamyz aıynyń sońyndaǵy Ulytaýdaǵy ult týraly tolǵanysynda Elbasy N.Á.Na­zar­baev týǵan Otanymyzdyń geo­saıası turǵyda qıyn­dyǵyn qı­syndy qylyp aıtsa, odan keıingi Qazaqstan halqyna arnalǵan «Nurly Jol» Joldaýynda eli­mizdiń geosaıası shıelenisterdiń epısentrine óte jaqyn jatqan aımaq ekenine basa nazar aýdardy. Al Qazaqstan Res­pýb­lıkasynyń Táýelsizdik kúnine arnal­ǵan saltanatty jıynda «Nur­ly Jol» Jańa Ekonomıkalyq Saıasa­ty ­ja­handyq syn-qaterlerge la­ıyq­ty jaýap bolyp tabylatynyn aıryqsha ­atap ótti. Basqasha aıtsaq, álemdik ­saıasatta kez kelgen ýaqytta oqtyn-oqtyn bolyp turatyn ­saıa­sı­ oıyn­dar memleket tizgi­nin us­taǵan bıleýshiniń boıy­nan qııadaǵyny kórip, alystaǵy­ny boljaıtyn dara bitimdi, harızmatıkalyq tulǵaǵa tán kóptegen merıtokratııalyq qa­sıetterdi talap etedi. Olaı deı­tinimiz, Qazaqstannyń geosaıası ornalasýy jaǵynan ǵasyrlar boıy shekken azaby shash-etekten. Daýylpaz aqyn, jaýjúrek batyr Mahambetshe aıtsaq, «Bul qonysqa qondyrǵan, ata-babam ońbasyn, tańda sırat basynda». Qazaq halqynda baǵzydan kele jatqan «Kórshini Qudaı qosady» degen qanatty sóz bar. Qysqartyp aıtsaq, Qazaqstannyń ekonomıkalyq jaǵynan tuıyq keńistikte ornalasýy óz aldyna, álemdegi alyp memleketterdiń qataryna kiretin uly kórshileriniń yrqynda ketpeı, derbestigin saqtap, memlekettiligin nyǵaıtýy – Máńgilik El bolýǵa umtylǵan Elbasynyń, ult elıta­synyń, ult asyldarynyń máńgilik saıası ustanymy. О́mir – kúres. О́mir – tartys. О́mir – báseke. Bul – tirshilik zańy. Kúres, tartys, báseke toqtaǵan jerde ómir toqtaıdy. Alash kósemi Á.Bókeıhanovsha aıtsaq, «talasyp-tartyspaǵan kisige de, halyqqa da támam qasqyrdyń arasynda báıge joq». Iá, álemde geosaıası oıyndar ádettegideı toqtaýsyz júrip jatyr. Bu­ryn babalarymyz ǵasyrlar boıy ult azattyǵy jolynda qa­nyn tó­gip, janyn berse, en­digi kúres, endigi maqsat – táýel­siz­dikti máńgi­lik etý. Elbasy N.Á.Nazarbaev: «Qaıtsem Qazaq elin máńgilik memleketke aınaldyramyn?!» deıtin asa uly memleketshil múdde jolynda tynymsyz izdenis ústinde júrgen halqymyzdyń parasatty perzenti. Máńgilik El bolýdy kózdegen memleket, aldymen óz tek-tamyrynyń tereńnen tartatynyn jáne ata-babasynyń óte baı tarıhy bar ekenin esinen bir sát te shyǵarmaýy tıis. Ulttyq ıdeıanyń ózegi – ult tarıhynda. Muny Elbasy bul joly da anyq ańǵartty. Qudaı qalasa, Qazaq memlekettilik tarıhyna arnalǵan birneshe datalyq mereıtoılardyń memleket deńgeıinde atalyp ótetinine erekshe toqtalyp, Alash balasynyń rýhyn asqaqtatty. Jańabek JAQSYǴALIEV, tarıh ǵylymdarynyń kandıdaty. ORAL.