Osyǵan oraı «Amanat» partııasynyń qatysýymen Almaty oblysynda «Taza Qazaqstan» aksııasy aıasynda aýqymdy ekologııalyq senbilik uıymdastyryldy. 600-ge jýyq adam jumyldyrylǵan tazalyq sharasynyń nátıjesinde ózen jaǵasynan 30 tonnadan astam qoqys jınaldy.
Jınalǵan qaldyqtardyń basym bóligi – plastık, shyny bótelkeler, taǵam qaldyqtary, qurylystyq, turmystyq qaldyqtar. Bir kúndik sharamen másele sheshilmeıdi. «Amanat» partııasy bul túıtkildi oblystyq ekologııalyq keńeste júıeli túrde kóterýdi josparlap otyr. Partııa bastamasymen týrıstik aımaqtarǵa arnaıy mártebe berý, qoqys alańdaryn ornatý, beınebaqylaý engizý, quqyq buzýshylarǵa ákimshilik jaza qoldaný tetikteri usynylmaq.
«Biz tabıǵat lastanǵannan keıin emes, lastanbaı turyp áreket etýimiz kerek. Qazir Ile boıyndaǵy jaǵdaı – eskerýsiz qalǵan aýmaqtyń naqty kórinisi. О́zen jaǵasy qoqysqa kómilip jatyr. Demalýshylar artynan eshteńe jınamaıdy. Qazan-oshaq pen taǵam qaldyqtary ózenge aǵyp, qorshaǵan ortaǵa tikeleı zııan keltirip otyr. Eger júıeli sheshim qabyldanbasa, jaqyn arada bul jer qaıtadan qaldyq astynda qalady. Másele – qoqystyń kóleminde emes, júıesizdikte. Bul aýmaqta ınfraqurylym atymen joq. Qoqys jáshigi de, baqylaý da, jaýapty mekeme de qarastyrylmaǵan», dedi partııanyń Almaty oblystyq fılıalynyń tóraǵasy, oblystyq máslıhattyń tóraǵasy Qýat Baıǵojaev.
Bul iske volonterler de belsene qatysty. «Amanat» partııasynyń «Jastar rýhy» jastar qanatynyń tóraǵasy Medet Bekbergenov: «Jalpy, tabıǵatqa janashyrlyq – nıet qana emes, naqty júıeli saıasatqa aınalýǵa tıis. Búgingi ekoaksııaǵa oblys ákiminiń ózi bastap, memlekettik qyzmetkerler, eriktiler, qoǵam belsendileri men «Amanat» partııasynyń músheleri qatysty. Volonterler bul máselemen alǵash ret betpe-bet kelip otyrǵan joq. Byltyr óz kúshimizben osy aýmaqtan 10 tonnadan astam qoqys jınadyq. Biraq bizden keıin taǵy da bári sol qalpyna tústi. Bul – bir rettik senbilikpen sheshiletin másele emes. Tabıǵatty qorǵaý júıeli baqylaý men naqty ınfraqurylymdy qajet etedi. Biz qansha tazalasaq ta, qoqys tastaýdy toqtatpaıynsha nátıje bolmaıdy», deıdi.
Aıta keteıik, ekologııalyq sharalar Ile ózenimen shektelmeıdi. Oblystyń 373 eldi mekeninde 80 myńnan astam adamnyń qatysýymen 38,9 myń túp aǵash otyrǵyzylyp, 120 aqparattyq túsindirý, 150 sanıtarlyq tazalaý sharasy ótkizildi.
Almaty oblysy
