Sýretti túsirgen – Jumabaı MUSABEK
О́ńir turǵyndarynyń densaýlyǵyn jaqsartý maqsatynda qaladan bólek, shalǵaıda jatqan aýyldarǵa medısına nysandaryn salý qolǵa alyndy. Memleket basshysynyń tapsyrmasyna saı, oǵan qajetti mamandardy aldyrý máselesi de jolǵa qoıylyp keledi. Kerbulaq aýdanynyń ortalyǵy Saryózek aýylynda 250 orynǵa arnalǵan emhana, Kóksý aýdanyna qarasty Aqshatoǵan, Eńbekshiqazaq aýyldarynda, Alakól aýdanyna qarasty Qamysqala aýylynda, Panfılov aýdanyna qarasty Shejin aýylynda 4 feldsherlik-akýsherlik pýnkt, Saǵabúıen aýylynda dárigerlik ambýlatorııa, Altynaryq aýylynda medpýnkt salynǵan. Sol sııaqty 58 blok-modýldi keshen ornatylǵan. Sonyń ishinde respýblıkada tuńǵysh ret Eskeldi aýdanynyń Qarabulaq aýylynda, Jarkent qalasynda blok-modýldik konstrýksııany qoldana otyryp turǵyzylǵan jedel jáne shuǵyl medısınalyq kómek qosalqy stansasy da bar. Oblys ákiminiń baspasóz qyzmetiniń málimetinshe, osyndaı nysandar bıyl taǵy tórt jerde – Úshtóbe qalasynda, Kerbulaq aýdanynyń Saryózek aýylynda, Kóksý aýdanynyń Balpyq bı aýylynda, Tekeli qalasynda boı kóteredi.
Oǵan qosa «Aýyldaǵy densaýlyq saqtaýdy jańǵyrtý» jobasy sheńberinde 15 nysannyń qurylysy aıaqtalyp, taǵy 44-iniń qurylysy jalǵasyp jatyr. Úshtóbe qalasynda demeýshiler esebinen 50 oryndyq dárigerlik ambýlatorııa boı kóterdi. Úsh jyl ishinde 7 nysanǵa kúrdeli jóndeý júrgizilse, bıyl taǵy 7-eýi kúrdeli jóndeýden ótkiziledi. Qabyldanǵan osyndaı sharalardyń arqasynda densaýlyq saqtaý salasynda beıimdelgen ǵımarattardyń sany 209-dan 127-ge qysqardy. Sondaı-aq bıyl beıimdelgen nemese jalǵa alynǵan ǵımaratta otyrǵan 72 medısınalyq mekeme úshin jańa nysandar salynyp, jabdyqtaý josparlanǵan. Oǵan qosa bıyl Taldyqorǵanda ınvestor kompanııanyń qarjysyna 200 oryndy zamanaýı onkologııalyq dıspanserdiń qurylysy bastalady.
Oblysta medısınalyq kadrlar jetispeýshiligi máselesin sheshýge de erekshe kóńil bólingen. Oblys ákiminiń tapsyrmasyna sáıkes respýblıkada alǵashqy bolyp óńirdegi aýyldyq jerge jumysqa kelgen dárigerlerge 10 mln teńgeden, qalalyq jerge 5 mln teńgeden bir rettik kótermeaqy berý júıesi engizildi. Osy maqsatqa 2024 jyly jergilikti bıýdjetten 495 mln teńge bólingen. Kótermeaqy 75 dárigerge tólenip, onyń 24-i aýyldyq jerde, 51-i qalalyq jerde jumys istep jatyr. Osyndaı sharalardyń arqasynda oblysta kadr tapshylyǵynyń sany 202-den 161-ge, ıaǵnı 20,3%-ǵa tómendegen.
Aýyldyq jerge kelgen dárigerdiń biri 17 jyldyq eńbek ótili bar hırýrg Nurmuhamed Baıjanov Qabanbaı aýylyndaǵy Alakól aýdandyq ortalyq aýrýhanasynyń bólimshesine jumysqa ornalasqan.
«Jumysymyz joǵary jaýapkershilikti talap etedi. Kishigirim jaraqatty qospaǵanda, kúnine 2–3 kúrdeli operasııa jasalady. Basty mindetimiz – adamdarǵa kómektesý. Meniń balalar hırýrgi, travmatologi, ortopedi, ýrologi baǵytynda tórt sertıfıkatym bar. Sondyqtan emizýli jastaǵy náresteden bastap, túrli operasııalar jasaı alamyn. Bólimde kez kelgen aýrýhanada bola bermeıtin laparoskop qurylǵysy bar. Mundaı zamanaýı medısınalyq jabdyqty paıdalaný jumysymyzdy edáýir jeńildetip, naýqastyń operasııadan keıingi ońaltý úderisin jedeldetedi», deıdi maman.
Jalpy, oblystaǵy medısına nysandarynyń bazasynda kardıohırýrgııa, onkologııa boıynsha kúrdeli operasııa jasalyp jatyr. Oblystyq kardıologııalyq ortalyqta búginde joǵary tehnologııaly medısınalyq kómektiń 20 túri kórsetiledi. О́tken jyly munda 380 operasııa jasalǵan. Atap óterligi, klınıkada jasandy ıntellekti bar júrek resınhrondaý terapııasy qoldanylady. Sol sııaqty bıyldan bastap kardıohırýrgııalyq operasııa balalarǵa da jasala bastady.
Bul rette Taldyqorǵandaǵy oblystyq perınataldyq ortalyqta 2023 jyly ashylǵan «Qamqorlyq» erte aralasý ońaltý ortalyǵyn da atap ótýge bolady. Innovasııalyq ortalyqta neıro-ortopedııalyq aýrýlary bar, onyń ishinde serebraldy sal aýrýy bar balalardy ońaltýdyń álemdik úzdik ádistemeleri men zamanaýı tásilderi engizilgen. Nysan 2023–2024 jyldary 215 balaǵa ońaltý sharalaryn júrgizse, bıyl jyl basynan beri 51 balany qabyldady.
Úsh jyl ishinde medısınalyq mekemelerdi qajetti qural-jabdyqpen qamtý deńgeıi 93%-ǵa jetti. 2022–2024 jyldary 133 jedel járdem kóligi satyp alynyp, kópshiligi aýyldyq jerlerge jiberildi, bıyl taǵy 29 sanıtarlyq kólik alynady dep josparlanǵan.
Búginde Alakól aýdanynyń shalǵaı eldi mekenderinde «Aýylda densaýlyq saqtaýdy jańǵyrtý» ulttyq jobasy aıasynda 9 medısınalyq mekeme salynyp jatyr. Olardyń jartysy jańa kólikpen qamtamasyz etiledi. Oblystaǵy 15 nysan daıyn tur. Olardyń tek aýmaqtaryn abattandyrý jumystary ǵana qaldy. Kólbaı aýylyndaǵy dárigerlik ambýlatorııany táýlik boıy jylytýǵa týra keledi. О́ıtkeni jylý munda uzaq ýaqyt saqtalmaıdy. Sol sebepti turǵyndar eldi mekende jańa aýrýhana salý qajettigin birneshe ret kótergen. Qazir bul másele sheshildi. О́tken kúzden bastap munda jańa ambýlatorııa salynyp jatyr.
«Okrýgte 3 myńǵa jýyq turǵyn bar. Jańa ǵımarattyń qurylysy qarqyndy júrip jatyr. Kórshiles Qyzylqaıyń aýylynda medısınalyq pýnkt salynyp bitti. Aqjar aýylynyń jańa feldsherlik-akýsherlik pýnkti men dárigerleri paıdalanýǵa berilýin kútip otyr», deıdi Kólbaı aýyldyq okrýginiń ákimi Erjan Shakerov.
Feldsherlik-akýsherlik pýnkttiń meńgerýshisi Galına Serjantova bul jerde barlyq kabınettiń jumys isteıtinin aıtady. Onda densaýlyǵy syr bergen barlyq adamǵa kómek kórsetiledi.
Oblystyq densaýlyq saqtaý basqarmasynyń málimetinshe, taǵy 18 nysandy sáýir aıynyń sońyna deıin tapsyrý kózdelip otyr. Qalǵan 26 medısınalyq mekemeniń qurylysy memlekettik rezerv qorynan qarajattyń túsýine qaraı aıaqtalady.
Jetisý oblysy
