Foto: Erlan Omar
Premer-mınıstr Oljas Bektenov tıisti qaýlyǵa qol qoıyp, Úkimet rezervinen shamamen 1,1 mıllıard teńge bólindi. Bul qarajat 2025–2026 jyldarǵa arnalǵan jylytý maýsymyna daıyndyq jumystaryn júrgizip, onyń irkilissiz ótýin qamtamasyz etý maqsatynda bólinip otyr.
«Bólingen qarajat «Kókshetaý jylý» kásipornynyń tehnologııalyq prosesterdi basqarýdyń avtomattandyrylǵan júıesin jáne baqylaý-ólsheý aspaptarynyń dalalyq deńgeıin jáne ssý jylytatyn tozań kómir qazandyǵynyń avtomatıkasyn, sondaı-aq qazandyq agregatynyń qyzdyrý betterin rekonstrýksııalaý, qazandyq agregatynyń aýa jylytqyshtarynyń tekshelerin jóndeý, tehnologııalyq resýrsy taýsylǵan jabdyqtardyń birlikterin jóndeý jáne aýystyrý jónindegi jobalardy júzege asyrýǵa baǵyttalady», delingen habarlamada.
Vedomstvonyń málimetinshe, Kókshetaý qalasynyń jylýmen jabdyqtaý júıesi negizinen №1 aýdandyq qazandyq (mazýt) jáne №2 aýdandyq qazandyqqa (kómir) súıenedi. Jylý jelileriniń jalpy uzyndyǵy 188,7 shaqyrymdy quraıdy, onyń ishinde 51 km — magıstraldy, al 137,7 km — oramishilik jeliler. Bul jelilerdiń kópshiligi 1977 jyldan beri paıdalanylyp keledi.
Esterińizge sala keteıik, 2024 jyly Úkimet rezervinen bólingen qarjynyń esebinen 6 shaqyrym magıstraldy jeli jóndelip, №2 jáne №3 qazandyq agregattaryna kúrdeli jóndeý júrgizilgen bolatyn. Sonyń nátıjesinde jylý júıelerindegi tozý deńgeıi 45%-dan 43%-ǵa deıin tómendep, tehnologııalyq aqaýlar sany 62 jaǵdaıdan 47-ge deıin qysqardy.
