Assambleıa – eldiń tutastyǵy men tynyshtyǵy jolynda qurylǵan qurylym. Ol elimizdiń árbir azamatynyń teńdigin, óz eline senimdiligin qamtamasyz etýdi maqsat tutty. Qazaq – ejelden teńdikti tý etken halyq. Qazaq teńdikti kóteredi, biraq kemdikti kótermeıdi. Sondyqtan da Assambleıa sol halyqtyń bolmysyna saı qurylyp, eldiń rýhanı birligin bekemdeýge baǵyttalǵan.
Otyz jyldyń ishinde Assambleıanyń sharyqtaǵan shaǵy da, saıabyrsyǵan kezi de boldy. Keıingi jyldary memlekettik tilge, salt-dástúrge, ádet-ǵurypqa kóńil bólinip, ásirese jastardyń qazaq tilin úırenýge degen yntasy artyp kele jatqany qýantady. Bul – durys baǵyt. Biraq meniń armanym – osy uıym alǵash qurylǵan kúnnen bastap túrli etnostar qazaqtyń tóńiregine toptasyp, qazaqtyń salt-dástúrin, mádenıetin qurmettep, osy jerdiń ıesi qazaq halqyna qurmetpen qarap ómir súrse degen nıet edi. Endi, Qudaıǵa shúkir, ol da birtindep júzege asyp kele jatyr. «Kósh júre túzeledi» deıdi qazaq, men soǵan senemin. Álde de kóńil tolmaıtyn tustar bar, biraq olar da retimen yńǵaılanady.
Jalpy, salystyrmaly túrde alyp qarasaq, elimiz beıbitshiligimen, dostyǵymen, keńpeıilimen ózgelerden ozyq tur. Qazaq – dalasyndaı darqan halyq. Onyń keńdigi – teginen, tektiligi – babasynan. Bizdi 1944 jyly jer aýdaryp ákelgende, qazaq halqy bizge qabaǵyn shytqan joq. Sol qıyn-qystaý zamanda baryn bólisip, jyly sózin aıamady. Qazaq ózgeniń janyn uǵyp, júrekpen túsine bildi. Stalın jylatqan halyqty qazaq jubata bildi. Men osy halyqty sondyqtan erekshe baǵalaımyn.
Al endi osy tynyshtyqty saqtaý – árbir azamattyń mindeti. Ultqa qyzmet etý uranmen emes, shynaıy áreketpen kórinýge tıis. Jeke bastyń múddesinen buryn, ulttyń múddesin bıik qoıǵanymyz abzal. Sonda ǵana biz naǵyz elge adal ul-qyzdar bolamyz. Men barlyq azamatty el bolashaǵy úshin birigip áreket etýge shaqyramyn. Ulttyq biregeılikti saqtaý, memlekettik tildi ulyqtaý, ortaq tarıh pen taǵdyrdy qurmetteý – bul barshamyzǵa ortaq jaýapkershilik.
Qazaq – osy eldiń uıytqysy. Qazaqtyń tóńiregine toptasý – ultty ulyqtaý emes, eldi biriktirýdiń joly. Memlekettik til – ózegimiz. Biz osy rýhpen, osy nıetpen alǵa basýymyz kerek. Assambleıa syndy uıymdar sonyń dánekeri bola alady. Sondyqtan bul qurylymnyń jumysy jandanyp, jańa serpinmen damı tússe eken deımin. El ishinde tatýlyq pen tynyshtyq saltanat qursyn! Qudaı tek kóp kórmesin! Qazaqtyń jeri aman, eli bútin bolǵaı!
Asyly OSMAN,
Qazaqstannyń eńbek sińirgen qaıratkeri, «Til janashyry» qurmet belgisiniń ıegeri
