Keshe keshke oblys ákimi Ǵaýez Nurmuhambetov kentke qaıyqpen baryp, jaǵdaıdy óz kózimen kórip, turǵyndarmen kezdesti. Qazir jaǵdaı birshama turaqty, úılerge sý kirgen joq, úıilgen bógetterdiń bıiktigi úımen birdeı. Dambany qum salynǵan qapshyqtarmen bekitýde áli de 200-deı adam júr.
Alaıda, jyl saıyn tasqynmen alysyp, turǵyndardy qaýipte qaldyra berýge bolmaıtyny kórinip tur. Osyǵan baılanysty ákim óziniń áleýmettik jelidegi paraqshasyna: «Bul problema júıeli túrde bolaıyn dep tur. Ony sheshý úshin turǵyndardy qaýipsiz jerge kóshirý kerek dep sheship otyrmyz. Qazirdiń ózinde eki qabatty jaıly páterli 2 úı salýdy qolǵa aldyq. Sol úılerge Zarechnyı kentiniń turǵyndaryn jyldyń aıaǵyna deıin kóshiretin bolamyz», dep jazdy.
