Májiliste Memleket basshysynyń sybaılas jemqorlyqtyń aldyn alý, sebepteri men jaǵdaılaryn joıýǵa qatysty tapsyrmalaryn oryndaý máselesi negizgi nazarǵa alyndy.
Resmı málimetke súıensek, birinshi toqsanda 67 taldaý men monıtorıng júrgizilip, 500-den astam usynym ázirlendi. Týrızm jáne mektepke deıingi bilim berý salalarynda anyqtalǵan júıeli táýekelder boıynsha halyqaralyq tájirıbege súıene otyryp, naqty sharalar usynyldy.
Bıýdjet qarjysynyń tıimdi jumsalýyna baqylaý nátıjesinde jyl basynan beri 21,2 mlrd teńge kólemindegi utymsyz shyǵynnyń aldyn alyndy. Onyń ishinde 6,4 mlrd teńge bıýdjetke qaıtaryldy. Máselen, Jezqazǵan qalasynda joldarǵa artyq bólingen 350 mln teńge únemdeldi, al Qonaev qalasynda jer ýchaskeleriniń qunyn arttyrý faktileri toqtatyldy. Jambyl oblysynda týrızmdi damytýǵa bólingen 208 mln teńge maqsatsyz jumsalýdan saqtaldy.
Aldyn alý maqsatynda ákimshilik tájirıbe de qoldanyldy: toqsan ishinde 18 adam jaýapkershilikke tartylyp, 5 mln teńgeden astam aıyppul salyndy. Kóbine múddeler qaqtyǵysy jáne bızneske zańsyz aralasý faktileri tirkelgen.
Agenttik basshylyǵy bıznes quqyǵyn qorǵaý baǵytyndaǵy jumystardy da jalǵastyrýda. «Bızneske jol» jobasy aıasynda 3 myńǵa jýyq kásipkerdiń quqyǵy qorǵalyp, 24 túıtkildi is sheshimin tapty. Máselen, Jetisý oblysynda sý tarıfteri qaıta qaralyp, kásipkerlerge 23 mln teńge únemdeýge múmkindik týdy.
Sonymen birge, qoǵamda parasattylyq pen zańdylyq qaǵıdattaryn nyǵaıtýǵa baǵyttalǵan aǵartýshylyq jumystar jalǵasyp jatyr. Birinshi toqsanda 450 myńǵa jýyq azamatty qamtyǵan 3 myńnan astam is-shara ótkizildi.
Keńes barysynda óńirlik departamentterdiń jedel jáne tergeý qyzmeti qorytyndylanyp, sybaılas jemqorlyq qylmystarynan kelgen zalaldy óteý boıynsha atqarylǵan jumystardyń tıimdiligi baǵalandy.
