Ulylar topyraǵynda týǵan ǵalym jas kúninen ádebıettaný ǵylymyna qulash urdy. Buryn kóp ǵalym júreksingen taqyrypqa túren saldy. Qazaq folklorynyń teorııasy men ádisnamasyna úńildi. Halyq aýyz ádebıeti muralarynyń tekstologııasyn zerttedi.
Ádebıet pen ónerdiń yqpaldastyǵyn zerdeledi. Qııal-ǵajaıyp ertegilerinen kandıdattyq, qazaq halyq prozasynan doktorlyq dıssertasııa qorǵady. Aıtýly tulǵanyń tańdaýly eńbekteri sheteldik ǵylymı ortada da óte joǵary baǵalandy.
Akademıktiń «Kazahskaıa volshebnaıa skazka», «Qazaqtyń halyq prozasy», «Rodnıkı ıskýsstva», «Kolybel ıskýsstva», «Kazahskaıa neskazochnaıa proza», «Abaı jáne folklor», «Zolotaıa jıla», «Janazyq», «Qozy Kórpesh–Baıan sulý». «Qyz Jibek», «Qazaqtyń ǵashyqtyq jyrlary», «XV–XVIII ǵasyrlardaǵy qazaq ádebıeti», «O folklore ı ne tolko», «Elzerde», t.b. monografııalary ǵylymdaǵy bıik jáne jaýapty deńgeıin kórsetti.
Seıit Qasqabasov kórnekti ǵalym ǵana emes, qabyrǵaly qaıratker edi. El táýelsizdigin qalyptastyrýǵa orasan eńbek sińirdi. 1988 jyly Qazaqstan kompartııasy ortalyq komıtetinde jaýapty qyzmet atqara júrip, Alash ardaqtylaryn aqtaýǵa úles qosty. Iri ulttyq rýhanı jobalardy júzege asyrdy. «Egemen Qazaqstan» gazetindegi súbeli maqalalary men suhbattary el aqyl-oıynyń oljasy bolyp qaldy.
Birneshe ýnıversıtette turaqty dáris oqydy. Folklortanýda saýatty mektep qalyptastyrdy.
Ǵulamanyń aldy – ózine, sońy – ult ǵylymyna jaryq bolsyn!
«Egemen Qazaqstan» qalamgerleri
