Senat Tóraǵasy Máýlen Áshimbaev dástúrge sáıkes ıgilikti iske arnaıy qatysyp, ashylý saltanatynda sóz sóıledi. Ol bul jarys salamatty ómir saltyn dáripteıtin jáne erekshe qajettilikteri bar balalardy qoldaýdy kózdeıtin mańyzdy qoǵamdyq bastamaǵa aınalyp kele jatqanyn aıtty.
«Prezıdent Qasym-Jomart Toqaev ınklıýzııany damytý máselesine únemi basa mán berip keledi. Memleket basshysy Ulttyq quryltaı otyrysynda erekshe qajettilikteri bar balalardy jan-jaqty qoldaýǵa arnalǵan jańa zań ázirleýdi tapsyrdy. Qazir osy bastama boıynsha tıisti jumystar qolǵa alyndy. Atalǵan zań shyn máninde azamattarǵa paıdaly bolýy úshin senatorlar qoǵamdyq uıymdardyń ókilderimen jáne sarapshylarmen birge bul baǵytta qandaı basymdyqtarǵa nazar aýdarý kerektigin jan-jaqty talqylap, belsendi jumys júrgizip keledi», dedi M.Áshimbaev.
Sonymen qatar palata spıkeri jarysty uıymdastyrýshylarǵa alǵys bildirip, olardyń on jyldan asa ýaqyt boıy ınklıýzıvti bilim berý isin damytý úshin eseli eńbek etip kele jatqanyna nazar aýdardy. Osyndaı tabandy jumystyń arqasynda aýtızmi bar júzdegen bala óz qatarlastarymen birge mektepter men balabaqshalarda oqýǵa múmkindik alǵanyn atap ótken jón.
