Sýret: senate.parlam.kz
Máýlen Áshimbaev Memleket basshysy Qazaqstan halqy Assambleıasynyń HHHIV sessııasynda belgilep bergen etnosaralyq qatynas salasyndaǵy mindetterge nazar aýdardy.
«Prezıdent Qasym-Jomart Toqaev qoǵamdyq kelisim salasyndaǵy birqatar mańyzdy bastamany aıqyndap berdi. Bul rette «Bir el – bir múdde» depýtattyq tobynyń óńirlermen ózara is-qımylyn odan ári nyǵaıtý jáne jalpyulttyq birlik ıdeıalaryn aqparattyq turǵydan belsendi túrde dáripteý qajet ekeni aıtyldy. Memleket basshysy Álemdik jáne dástúrli dinder kóshbasshylary seziniń atalǵan baǵyttaǵy rólin de erekshe atap ótti. Osy oraıda senatorlardyń eldegi qoǵamdyq kelisimdi nyǵaıtýǵa, azamattardyń quqyqtaryn qorǵaýǵa jáne Ádiletti Qazaqstan qalyptastyrýǵa qajetti berik zańnamalyq baza qurýdy kózdeıtin jumysy aıryqsha mánge ıe», dep palata tóraǵasy áriptesterin Memleket basshysy júktegen mindetterdi sapaly iske asyrý jolynda odan ári belsendilik tanytýǵa shaqyrdy.
Sonymen qatar senatorlar osy aptada ótetin komıtet otyrystarynda qaralatyn taqyryptardy pysyqtady. Atap aıtqanda, depýtattar áskerı qyzmetshiler men olardyń otbasy múshelerin medısınalyq qamtamasyz etý, Ulttyq qor qarajatyn basqarý tıimdiligin arttyrý, jylý energetıkasy jáne veterınarlyq qyzmet salasyn damytý máselelerin talqylaıdy. Sondaı-aq «Qazaqstan Respýblıkasynyń keıbir zańnamalyq aktilerine ekonomıkalyq quqyq buzýshylyqtardyń jekelegen túrlerin qylmystyq sıpattan aryltý jáne zańsyz jolmen alynǵan kiristerdi zańdastyrýǵa (jylystatýǵa) jáne terrorızmdi qarjylandyrýǵa qarsy is-qımyl týraly zańnamasyn jetildirý máseleleri boıynsha ózgerister men tolyqtyrýlar engizý týraly» zańdy júzege asyrý aıasynda kásipkerlik sýbektileriniń quqyqtaryn qorǵaý máselelerine arnalǵan dóńgelek ústel uıymdastyrylady. Is-sharada depýtattar múddeli taraptarmen birlesip, atalǵan saladaǵy túıtkilderdi sheshý jáne ony damytý tetikterin talqylaıdy.
