Sýretti túsirgen – Erlan OMAR, «EQ»
Byltyr oblys dıqandary rekordtyq mólsherde astyq jınap, aıdy aspanǵa shyǵardy. Bul oraıda olardyń pikirinshe memlekettik qoldaýdyń kómegi molynan tıgen. Bıyl sol joǵary qarqyndy saqtap qalý, odan ári damytý mindeti júktelip otyr. Memlekettik qoldaý týraly aıtqanda «Keń dala-2» baǵdarlamasy aıasynda jeńildetilgen nesıeniń óńir dıqandaryna ótken jyldyń qarasha aıynan bastap berile bastaǵanyna erekshe toqtalǵan jón.
– Bul – jaǵymdy jańalyq, – deıdi Zerendi aýdanyndaǵy «Qulan» sharýa qojalyǵynyń ókili Qulan Bolatov, – buryn nesıe qolymyzǵa kesh tıetin, qamdanyp úlgere almaıtyn edik. Jazdyń qamyn qysta jep, materıaldyq-tehnıkalyq bazamyzdy nyǵaıtýǵa mol múmkindik týyp otyr. Egis jumystaryna sapaly daıyndalý úshin aldymen qolda bar tehnıkamyzdy jóndep aldyq. Sapaly tuqymdy da qarastyrdyq. Qajet bolyp qalýy múmkin qosalqy bólshekter qoryn jasadyq. Osynyń barlyǵy – nesıeniń erte berilgeninen.
Búginde oblystyń 600 fermeri 66 mlrd teńgeniń jeńildetilgen nesıesin alyp úlgergen. Jalpy, oblys boıynsha 94,7 mlrd teńgege ótinish túsken. Qazir qosymsha qarajat qarastyrylyp jatyr. Taıaýda ótken oblystyq agrarlyq keńeste sóz sóılegen Aýyl sharýashylyǵy vıse-mınıstri Azat Sultanov agrarshylardy ónimdilik pen tıimdilikti arttyrý úshin barlyq qoljetimdi tetikti paıdalanýǵa shaqyrdy.
– Byltyr bastalǵan jeńildetilgen nesıe berý kómegi bıyl da jalǵasyn tabady ári kólemi ulǵaıtyldy. Soltústik óńirdegi ahýal aýa raıyna tikeleı táýeldi. Biraq ónim sapasyna meılinshe mán berilýi kerek. Agrarlyq nesıe korporasııasy, ekinshi deńgeıli bankter, nesıelik seriktestikter, óńirlik ınvestısııalyq ortalyqtar men mıkroqarjylyq uıymdar arqyly nesıe alýǵa ábden bolady, – dedi.
Vıse-mınıstrdiń málimetine qaraǵanda, bıyl aýyl sharýashylyǵy salasynyń eńbekkerleri úshin aıta qalarlyqtaı jańalyq bar. Jeńildetilgen lızıng arqyly qarjylandyrý kólemi 200 mlrd teńgege deıin kóbeıgen. Al forvardtyq satyp alý baǵdarlamasy boıynsha 30 mlrd teńge kóleminde qarjy bólingen. Oblysta kóktemgi egis naýqanyn uıymshyldyqpen uıymdastyrýǵa qajetti resýrs jetkilikti. Oblys ákiminiń orynbasary Murat Balpannyń aıtýynsha, bıyl 5,4 mln gektar alqapqa dán sińirilmek.
О́ńirdiń agroónerkásiptik keshenin damytýǵa 200 mlrd teńge bólindi. Onyń 63,3 mlrd teńgesi sýbsıdııa bolsa, 140 mlrd teńgege jýyǵy – jeńildetilgen nesıe men forvardtyq satyp alý. О́nimdilikti arttyrý maqsatynda egis alqaptaryna 336 myń tonna mıneraldy tyńaıtqysh engizý josparlanǵan. О́tken jylmen salystyrǵanda tyńaıtqysh engizilgen alqaptar kólemi 78 myń gektarǵa kóbeımek. Kúni búginge deıin 66,9 myń tonna tyńaıtqysh alýǵa 226 kelisim jasaldy. Sapaly tuqymmen qamtamasyz etý boıynsha da aýqymdy jumys atqaryldy. Qazir barlyq tehnıka daıyn. Kóktemgi egis jumysyna 37 myń tehnıka qatystyrylmaq.
Aqmola oblysy
