Foto: Igor Býrgandınov
«Qazposhtanyń» basqarýshy dırektory Dáýlet Bekmanov is-sharanyń mańyzdylyǵyn atap ótip, poshta qyzmetiniń jańa bastamalary týraly sóz sóıledi.
«Otyz jyldan astam ýaqyt ishinde bir mıllıardtan astam gazet-jýrnal jetkizip, oqyrmandarymyzdyń aqparattyq-tanymdyq qajettiligin óteýge qyzmet etip kelemiz. Bizdiń poshtashylar jyl saıyn myńdaǵan shaqyrym jol júrip, jazylýshylarǵa basylymdardy jetkizedi. Al suryptaýshylardyń qolynan kún saıyn ondaǵan myń gazet-jýrnal ótedi. Qazir biz el azamattaryna qolaıly bolýy úshin «Qazposhtanyń» jazylý jáne jetkizý qyzmetin barynsha sıfrlandyrýǵa kúsh salyp jatyrmyz», dedi poshta dırektory.
Osy másele tóńireginde tolyǵyraq bilý úshin «Qazposhta» kompanııasynyń merzimdi baspasózdi basqarý departamentiniń dırektory Botakóz Abyqanovany sózge tarttyq. Onyń aıtýynsha, Kazpost qosymshasyn qoldanyp, merzimdi basylymdarǵa jazylatyn oqyrmandar kóbeıip keledi.
«Kazpost qosymshasy arqyly jazylý – barynsha yńǵaıly jáne jyldam. Endi azamattarymyz basylymǵa bir ǵana mınýtta jazyla alady. Bul ózgeris jazylýshylardyń ýaqytyn únemdeıdi ári qyzmet kórsetý sapasyn arttyrady. Sonymen qatar, biz gazet-jýrnaldarǵa da júkterge mórlenetin shtrıh kod engizýdi josparlap otyrmyz. Bul shtrıh kod gazettiń qaı núktede kele jatqanyn naqty anyqtaýǵa múmkindik beredi. Iаǵnı jazylýshy tapsyrys bergen gazet-jýrnaldyń qaı núktege toqtaǵanyn anyq bilip otyrady. Bul ashyqtyq poshta qyzmetin barynsha aıqyn ári senimdi etedi. Sonymen qatar, bul jańa júıe poshta qyzmetkerleriniń jaýapkershiligin arttyryp, qyzmet kórsetý úderisin ońtaılandyrady», dedi B. Abyqanova.
Sózinen ańǵarǵanymyzdaı qazir «Qazposhta» oqyrmandarmen baılanysyn arttyrýǵa baryn salyp jatyr. Soǵan oraı osy-kúni gazet-jýrnalǵa jazylǵan alǵashqy on oqyrmanǵa arnaýly syılyqtar tabys etildi. Juldyzy janǵan sondaı oqyrmandardyń biri – Meıirbek Meırambekov. О́zi jas jigit. «Lıter» gazetiniń turaqty oqyrmany eken. Ádette gazet-jýrnal oqyrmandary qartaıyp bara jatyr degen sózdi jıi estıimiz. Al bul keıipkerimiz baspasózben bala kezinen dos.
«Bul ádetti meniń anam qalyptastyrdy. Ol kisi «Aıgólek», «Baldyrǵan», «Aq jelken» syndy jýrnaldardy únemi aldyryp otyrdy. Sol sebepti kúndelikti ómirde saraptan ótken, jan-jaqtan tekserilgen aqparattardy oqýǵa daǵdylandym», deıdi ol.
Sonymen qatar biz odan basylymǵa jazylý úderisiniń jeńildegeni qanshalyqty baıqalatynyn surap kórdik.
«Gazet-jýrnalǵa jazylýdyń qarqyndy túrde sıfrlanyp kele jatqany anyq ańǵarylady. «Qazposhta» bul tusta jaqsy kreatıvti bastamalar jasaýǵa talpynyp jatyr. Alaıda bul jobalardyń ótkeninen kópshilik qaýym habarsyz bolyp qalady. Meniń ózim bul is-sharanyń ótetinin jýrnalıst tanystarym arqyly estip bildim. Sol sebepti «Qazposhta» búgingideı ıgilikti jobalaryn halyq kóp júretin jerlerde nasıhattap, gazet-jýrnal oqýdy ashyq-jarqyn jarnamalasa eken degen tilegimiz bar», dep usynysyn bildirdi M. Meırambaev.
Jıyn sońynda «Qazaq gazetteri» JShS bas dırektorynyń orynbasarlary Vıktor Prıanıkov pen Qambar Ahmet, «Túrkistan» gazetiniń bas redaktory Baýyrjan Babajanuly bastaǵan basylym basshylary bıylǵy jyly úlken eńbek sińirip «Úzdik poshtashy», «Úzdik operator» jáne «Úzdik suryptaýshy» nomınasııasyna ıe bolǵan qyzmetkerlerge quttyqtaý gramotalaryn tabystady.
