Foto: URA.RU
Depýtat óz sózinde «Qoljetimdi ınternet» ulttyq jobasy aıasynda barlyq oqý oryndaryn ınternetpen qamtý jumystary júrgizilip jatqanyn atap ótti. Resmı derekterge sáıkes, elimizdegi 5247 aýyl mektebiniń 5122-si ınternetke qosylǵan. Alaıda, bul kórsetkishterdiń sapasy kóńil kónshitpeıdi.
«2022 jylǵy 24 qarashadaǵy №473 Bilim mınıstriniń buıryǵymen mektepter úshin ınternet jyldamdyǵyna qoıylatyn eń tómengi standarttar bekitilgen. Alaıda júrgizilgen taldaý kórsetkendeı, bul salada áli de kúrdeli máseleler bar», dedi Erkebulan Saýryqov.
Depýtattyń aıtýynsha, óńirlerdi zerdeleý barysynda, atap aıtqanda Aqtóbe oblysynda aýyl mektepteriniń 78%-ynda ınternet jyldamdyǵy talap etilgen deńgeıdiń 50%-yna da jetpeıtini anyqtalǵan. Mundaı jaǵdaı basqa óńirlerde de kezdesedi.
«Kóktemgi sý tasqyny kezinde kóptegen aýyl mektepteri baılanyssyz qalyp, bul tek oqý prosesin ǵana emes, oqýshylar men muǵalimderdiń qaýipsizdigin de qaýip-qaterge ushyratty. Starlink sııaqty balama spýtnıktik ınternet tehnologııalaryn qoldaný da áli kútken nátıjelerdi bermeı otyr: baılanys jıi úzilip, jyldamdyq turaqsyz, bul óz kezeginde onlaın resýrstardy tolyq paıdalaný múmkindigin shekteıdi», dedi depýtat.
Sonymen qatar Erbolat Saýryqov ınternet qyzmetiniń sapasyn avtomattandyrylǵan túrde baqylaý júıesiniń joqtyǵyna erekshe toqtaldy. Qazirgi tájirıbe quqyq buzýshylyqtardy ýaqytyly anyqtap, joıýǵa múmkindik bermeıdi. Resmı túrde ınternetke qosylǵan mektepterde shyn máninde oqýshylardyń onlaın platformalarǵa qol jetkizýi qamtamasyz etilmegen.
«Aýyl mektepterinde sapaly ınternettiń bolmaýy qala jáne aýyl mektepteri arasyndaǵy bilim berý sapasy alshaqtyǵyn tereńdetýde. Búginde kóptegen oqý baǵdarlamalary men resýrstar onlaın formatqa kóshken jaǵdaıda, turaqty ınternettiń bolmaýy aýyl oqýshylarynyń zamanaýı bilim alý múmkindigin shekteıdi. Bul jaǵdaı Qazaqstan Respýblıkasy Konstıtýsııasynda bekitilgen bilim berý teńdigi men qoljetimdiligi qaǵıdattaryna sáıkes kelmeıdi dep esepteımiz», dedi depýtat.
Depýtat halyqaralyq tájirıbelerdi mysalǵa keltirip, ásirese Fınlıandııanyń 2010 jyly ınternetke qoljetimdilikti ár azamattyń negizgi quqyǵy retinde zań júzinde bekitkenin, sondaı-aq mektepterdi keń jolaqty ınternetpen jáne rezervtik arnalarmen jabdyqtaǵanyn atap ótti. Estonııanyń «Tiger Leap» jobasy men Kanadanyń «Connect to Innovate» baǵdarlamalary da aýyl mektepterin joǵary jyldamdyqty ınternetpen qamtýdy memlekettik basymdyq retinde júzege asyryp jatqanyn aıtty.
Osyǵan oraı, depýtat kelesi sharalardy qabyldaý qajettigin alǵa tartty:
-Barlyq aýyl mektepteriniń ınternetke qosylý jaǵdaıyn táýelsiz tehnıkalyq sarapshylarmen keshendi tekserý; ınternetke qosý áreketteriniń zańdylyǵy men sapasyn baǵalaý; jaýapty tulǵalardy jáne áreketsizdik faktilerin anyqtap, kinálilerdi jaýapkershilikke tartý;
-Internet jyldamdyǵy men sapasyn avtomattandyrylǵan monıtorıng júıesi arqyly turaqty baqylaý;
-Aýyl mektepteri úshin ınternet sapasynyń naqty mınımaldy talaptaryn qaıta qarap, quqyqtyq aktilerge jáne qajet bolsa, bilim týraly zańǵa ózgerister engizý. Bul talaptardy oryndamaǵan baılanys operatorlaryna qatysty zań júzinde jaýapkershilik bekitý;
-Baılanys jáne mobıldi jeli bolmaǵan shalǵaı eldi mekenderde spýtnıktik ınternetke qosylýdy sýbsıdııalaý tetigin engizý múmkindigin qarastyrý;
-Baılanys operatorlarynyń jumysyna memlekettik baqylaýdy kúsheıtý;
-Memlekettik satyp alýlar kezinde baılanys qyzmeti kelisimsharttaryna ınternet sapasyna qatysty naqty talaptar engizý jáne olardy oryndamaǵan jaǵdaıda joǵary kólemdegi aıyppul salý tártibin bekitý.
«Bilimge qoljetimdilik – bul tek bilim salasynyń ǵana emes, tutas memlekettiń bolashaǵyna qatysty másele. Sondyqtan aýyl mektepterindegi ınternet sapasyn arttyrý – bizdiń ortaq mindetimiz. Bul másele nazardan tys qalmaýǵa tıis. Zań júzinde jaýapkershilikti naqtylap, is júzinde nátıje beretin sheshimder qabyldaıtyn ýaqyt jetti», dedi Erbolat Saýryqov.
