Kollajdy jasaǵan – Záýresh SMAǴUL ,«EQ»
Osy kitaptyń qalaı jazylǵanyn da biletin edim. Eki, álde úsh jyl boıy tynymsyz eńbek etti. Týǵan jer týraly tolǵanys, aýyldyń alǵashqy qazyǵyn qaqqannan beri ósip-órkendeý joly. El baılyǵyn eselegen eńbekqor adamdar, Ekinshi dúnıejúzilik soǵysta jat jerde qalǵan bozdaqtar, soǵystan aman kelip, týǵan jerdiń tútinin túzý ushyrýǵa úles qosqandar. El ishindegi bereke-birlikke uıytqy bolǵan jaqsy men jaısań, kópbalaly analar. Kim joq deısiz táıiri, osy topyraqta kindik qany tamǵan qanshama jurt. Túgelge jýyq bolar.
Apta aralatyp, aı aralatyp aqsaqal kabınetimniń tabaldyryǵynan attap keler edi. Jańa bir derek taýyp ákelipti, jańa bir áńgime estipti. Sony jınaǵyna qosyp, mazmunyn baıytpaq, maǵynasyn ústemek. Qolqasy da bar. Aıtary «Men jazýshy emespin ǵoı, myna bir sóılemderdiń murtyn basyp bershi». Úlkenniń sózin dalaǵa tastaýǵa bolmaıdy. Bilgenimizshe kómek kórsettik. Mundaı dúnıelerge muqııat bolý kerek. Shynynda solaı-aý, erteń osy aýyl týraly maǵlumat izder jan bolsa, kerek dúnıesiniń bárin osy jınaqtan tabary sózsiz.
«Men de aýylym týraly kitap jazyp edim, – dedi qasymda otyrǵan kópshilikke tanymal kósheli kisi. – Táp-táýir jınaq bolyp shyqty. Keıin aýyldastaryma eki myń teńgeden satyp alyńdar desem, eshqaısysy alǵysy kelmeıdi. Ishinde ózderiniń ákeleri men atalary týraly derekter bar».
Álden ýaqytta syrty ádemi bezendirilgen, qap-qalyń jınaqtyń tusaýy kesilip, shashý shashyldy. Ádettegideı sóz sóılengen. Baspahanadan jańa shyqqan, sııasy áli keppegen jınaqty oqymasa da, kódedeı kóp sheshen qııalaı tartqan. Birinen biri asyryp maqtap jatyr. Sóz sońynda el murasyna óz úlesin qosqan aqsaqal búgingi sharýasynyń máni týraly qysqasha aıtyp ótti. Oıyn túıindeı kele, kitaphananyń irgesindegi dámhanada dastarqannyń jaıýly turǵandyǵyn aıtyp, tusaýkeserge qatysqan tilektes, nıettes aǵaıyndy sonda shaqyrdy. Dál osy sózdi tosyp otyrǵandaı osharylǵan top dúrk etip kóterilgen. Kóptiń sońyn ala biz de shyqtyq. Shyǵyp bara jatyp qarasam, aldyńǵy oryndyqtarda jańa ǵana aqsaqal syılaǵan on shaqty kitap qalyp barady eken. Qap...
Kókshetaý
