Biz Jezkentte aýyr óndiriste isteıtin adal azamat, eńbek adamdarynyń otbasy Ibraevtyń úıine tústik. Erjan men Krıstına Shyǵys tústi metallýrgııa kompanııasynyń Orlov óndiristik keshenindegi ken baıytý fabrıkasynda jumys isteıdi. Kásiporyn mys jáne myrysh konsentraty sııaqty ónimderdi shyǵarady.
«Men 2013 jyldan Orlov ken baıytý fabrıkasynda súzgileý jáne keptirý bóliminiń sheberi bolyp isteımin. Jubaıym orys ultynyń ókili Krıstına Ibraeva tehnıkalyq baqylaý bóliminde jumys isteıdi. Biz 2018 jyly otaý kóterdik. Sodan beri óndiriste birge istep kelemiz», deıdi Erjan Ibraev.
Bir qyzyǵy, Krıstınanyń bólimi Erjannyń shyǵarǵan ónimin tekseredi eken. Bul – olardyń jumysyna degen jaýapkershiligin arttyra tússe kerek. «О́nim sapasyz ótse, úıge kelgende de ońaı bolmaıdy» deıdi Erjan ázildep. Biraq osy ázildiń astarynda shyndyq jatyr, olardyń kásibıligi men óz isine adaldyǵy birin-biri tolyqtyryp-aq turǵandaı.
Erjan men Krıstına – Jezkenttegi júzdegen óndiris adamdarynyń bir kórinisi ǵana. Munda dál osyndaı jup kóp. Túrli ult ókilderiniń bir maqsatqa jumylyp, aýyr eńbektiń qyzyǵy men shyjyǵyn birge kórýi – bul kentke tán kórinis. Báriniń eńbekke degen qurmeti, tatýlyqqa degen senimi mol.
«О́ndiris tek tehnıka men temir emes. Bul – adamdardyń eńbegimen, senimimen júretin tiri organızm sııaqty. Munda shynaıylyq pen tatýlyq bolmasa, eshteńe júrmeıdi», deıdi Krıstına.
Rasymen de, Jezkenttiń ózgeshe otbasylary – el ishindegi úlken birlik pen eńbek mádenıetiniń aınasy ispettes. Sol arqyly aýyldyń da, óndiristiń de keleshegin birge quryp keledi.
Bul kent ken ǵana emes, elge de kende emes. Onda ártúrli ult ókilderi tatý-tátti ómir súrip jatyr. Báriniń balalary bir mektepke baryp, bir kóshede oınap ósken. Ult pen ulysqa qaramaı, bári de ken oryndarynda ıyq tirestirip jumys isteıdi. Ár úıde eńbek – basty qundylyq. Osy ortada ósip-jetilgen Erjan men Krıstınanyń otbasylyq ómiri de sol ortaq mádenıettiń jemisi ispetti.
Erjan Serikulynyń ata-anasy da kezinde osy kenttegi ken baıytý óndirisinde jumys istegen, elge eńbegi sińgen otbasy eken. Jezkentte ár ult óz tilin, saltyn saqtaı otyryp, ortaq qundylyq – birlik pen eńbek joǵary qoıady.
Búginde Erjan men Krıstına da jas mamandarǵa baǵyt-baǵdar berip, tájirıbelerimen bólisip júr. Olardyń aıtýynsha, óndiristegi úılesim – tek tehnıkadaǵy emes, adamdar arasyndaǵy senim men syılastyqta. «Qıyn jumys ta jeńil ótedi, eger aınalańda bir-birińdi qoldaıtyn orta bolsa», deıdi olar. Jezkent – el ishindegi qarapaıym ǵana kent emes, bul – kópultty eńbek adamynyń birlikte ómir súre alatynyn dáleldeıtin aýyl. Al Ibraevtar syndy otbasylar – eldiń erteńine úmitpen qaraýǵa negiz bola alady.
