El basyna kún týǵanda qanshama atalarymyz ben analarymyz jerimizdi jaýdan qorǵaýǵa attandy. Solardyń arasynda óner adamdary da Otan aldyndaǵy paryzyn oryndap, urpaǵynyń amandyǵy men bolashaǵy úshin jandaryn qıyp, sheıit ketti. Máselen, Smaǵul Kóshekbaev, Ǵabdulman Matov, Málik Jappasbaev, Ysqaq Ýálıev, Ramazan Elebaev sekildi marǵasqalardy ataýǵa bolady. Soǵystan aman-esen elge oralǵandardyń ishinde Rústembek Omarov, Nurǵısa Tilendıev, Turash Ábýov, Samıǵolla Andarbaev syndy óner maıtalmandary bar.
Osyndaı erjúrek atalardy eske alýǵa arnalǵan is-sharany Qazaqstannyń eńbek sińirgen qaıratkeri, professor Dáýren Ǵylymov jetekshilik etetin Stýdenttik qazaq halyq aspaptar orkestri Murat О́skimbaevtyń «Jeńis» kúıimen ashty. Dına Nurpeıisova atyndaǵy respýblıkalyq qoǵamdyq qordyń tóraǵasy, pedagogıka ǵylymdarynyń kandıdaty, professor Tólegen Qýanyshev pen Qazaqstannyń eńbek sińirgen mádenıet qyzmetkeri, K.Baıseıitova atyndaǵy QazUО́Ý-diń professory Aıtjan Toqtaǵan Jeńis kúnin jaqyndatqan qaharmandardyń ǵumyr tarıhyna toqtaldy.
«Soǵys kezindegi jáne odan keıingi shyǵarmalardy zerttep-zerdeleý – ónerli aǵa býynnyń bizge qaldyryp ketken amanaty dep qabyldaǵanymyz oryndy bolar. Sol ýaqytta jazylyp, tartylǵan kúıler men oryndalǵan ánderde muń men zarly únderdiń basym ekendigi aıqyn baıqalady. Sebebi bul kezeńdegi shyǵarmalar balasy nemese jary qan maıdanǵa attanyp, qaıtyp elge kelerin ne kelmesin bilmeıtin qapaly kúı keshken tusta, osyndaı sezimderdiń nátıjesinde týyndady. Mysal retinde Kenen Ázerbaevtyń «Bizdiń Otan jeńedi», Smaǵul Kóshekbaevtyń «Maıdanǵa» atty ánderin jáne Dına Nurpeıisovanyń «Maıdandaǵy balama» atty kúıin aıtýǵa bolady» dep atap ótti professor T.Qýanyshev.
Konsertte Qurmanǵazynyń «Erteń ketem», «Pabeski», «Laýyshken» kúıleri, sondaı-aq, «Maıdanǵa», «Jas qazaq», «О́tti ómir», «Súıgen jar», t.b. ánder oryndaldy. Is-shara búginde 100 jyldyǵy toılanyp jatqan Halyq qaharmany Nurǵısa Tilendıevtiń «Jeńis saltanatymen» aıaqtaldy.
