Alǵashqy ónimin naryqqa osydan segiz jyl buryn shyǵarǵan kásiporyn jumysy birden dańǵyl jolǵa túsip kete qoıǵan joq. On jeti jyl bilim salasynda eńbek etken Janar bastapqyda jumys pen kásipti qatar alyp júrdi. Byltyrdan bastap besik jabdyǵynan bastap, súndet toı, qyz uzatý, tusaý kesý, qudalyq rásimine qatysty barlyq kádesyı men ulttyq buıymdardy erekshe oıý-órnekpen ázirleıtin kásibin keńeıtý maqsatynda «Mansap» ortalyǵymen memorandýmǵa otyrdy. Osy arqyly qazir jumyssyz azamattardy oqytyp, olardy jumyspen qamtyp jatyr. Búginde munda 17 tiginshi jumys isteıdi.
«Biz tek qyz jasaýy ǵana emes, kórpe-jastyqtar, sándi jıyntyqtardy tigemiz. Sanǵa emes, sapaǵa basa mán beremiz. Sonyń arqasynda suranys ta kóp. Memlekettik grant qarjysyna aqsha qosyp, kópten beri kózdep júrgen lazer aldym. Oǵan deıin 30-40 mln teńgeniń qurylǵylary bolǵan. Biraq grant aqshasyna alǵan lazerdiń orny bólek. Qurylǵy uzyn matany qımaı, qalaǵanyńyzdaı oıý-órnek salyp beredi. Áleýmettik jelidegi jarnamamyzdy kórgender ár óńirden tapsyrys berip jatyr. Sheteldegi qandastarymyzdyń da tapsyrysyn jıi oryndaımyz. Bul – úlken maqtanysh», deıdi kásipker.
Memlekettik qoldaý arqyly kásibin keńeıtip otyrǵan jannyń biri – Gúlfıra Shamahanova. Bastapqyda úıinde kondıterlik ónimder pisirgen ol memleketten alǵan qaıtarymsyz grantqa qajetti qural-jabdyqtar satyp aldy. Búginde qalanyń Eski bazar aýmaǵyndaǵy saýda núktesiniń turaqty tutynýshylary bar. Pisirgen torttary men táttileri sórede kóp turmaı, tez satylyp ketedi.
Memlekettik qoldaýǵa ıe bolǵan jobalar arasynda erekshe bıznes túrleri de kezdesedi. Kópbalaly ana retinde grant konkýrsyna qatysqan Ásem Álimova «Akva álem» degen joba ázirlepti. Bastamasy qoldaý taýyp, hobbı retinde bastalǵan isti kásipke aınaldyryp otyr. Qazir akvarıýmdar daıyndap, oǵan balyq ósiredi. Áınekterdi kesip, bir-birine jelimdep jasaǵan akvarıýmdaryn suraýshylar kóp. Aı saıyn tapqan tabysy da artyp keledi.
«Áýelgide úıde balyq ósirip, zoodúkenderge ótkizip júrdik. О́tken jyly 1 476 800 teńge kóleminde memlekettik grant jeńip alyp, kásip bastap kettik. Qazir Taıland pen Indonezııadan kelgen balyqtyń otyzshaqty túrin ósiremiz. Árqaısysynyń kútimin eskerip, qajetti dárilerin berip otyramyz. Osy iske qyzyǵatyn jeke adamdardan bólek mektepter men balabaqshalardan suranys kóp túsedi. Basqa óńirlerden túsken tapsyrystardy da oryndaımyz. «WhatsApp» arqyly tutynýshylarǵa keńes berip otyramyz», deıdi Ásem Álimova.
«Mansap» ortalyǵynyń Qyzylorda qalalyq fılıaly dırektory Jaqsylyq Tólegenovtiń aıtýynsha, byltyr 520 adamǵa memlekettik grant bólingen.
Biraq olardyń arasynan 97 azamattyń qarjyny maqsatsyz paıdalanǵany anyqtalyp, qujattary sotqa joldanypty. Bıyl 476 jobany qarjylandyrý josparlanyp otyr.
QYZYLORDA
