Sábıdiń anasy Aıbat qyzynyń ýaqytynda týyp, qalypty damyǵanyn aıtady. Sol úshin de densaýlyǵynda kinárat bar degendi tipten oılamaǵan. Keıin, týǵanyna eki aı shamalaǵanda terisi kógerip, jıi qusyp, embeı, mazasy qashqan. Sábıdiń ata-anasy dereý pedıatrǵa, sodan soń nevropatologqa júgingen. Kóp uzamaı ýltradybystyq zertteýde balanyń tóbe-qaraqus aımaǵynda túzilgen suıyqtyq anyqtalǵan.
KT apparaty sábıdiń sol jaq tóbe bóliginde kólemdi isiktiń baryn rastapty. Al, MRT mıdyń fýnksıonaldy mańyzdy aımaqtarynda ornalasqan 5,6× 4,2 sm kólemindegi isikti naqty kórsetken. Osydan soń balalar neırohırýrgy Dmıtrıı Sýrdın, Álibek Jarasov jáne basqarma tóraǵasynyń orynbasary Asylbek Qalıev bastaǵan bir top maman keńesip, shuǵyl operasııa jasaý týraly sheshim qabyldaǵan. Sábıdi balalar neırohırýrgııasy bólimshesine jatqyzǵan. Bul kez qyzdyń anasy janyn qoıarǵa jer tappaı, qatty kúızelgen.
«Alǵashynda qyzymnyń aýyr syrqaty bar degenge ılanǵym kelmegeni ras. Biraq keıin es jıyp, alda qandaı qaýip kútip turǵanyn túsingen soń, kez-kelgen jaǵdaıǵa daıyn bolýǵa tyrystym. Qýanyshqa qaraı, bizdiń tilegimiz qabyl bolyp, qyzymyz aman qaldy. Qazir jaǵdaıy jaqsaryp keledi. Dárigerlerge, neırohırýrg Dmıtrıı Sýrdınge, ortalyqtaǵy barlyq medısına qyzmetkerlerine rızashylyǵymdy bildiremin», degen sábıdiń anasy Aıbat, ortalyq ujymyna alǵys aıtty.
Balalar neırohırýrgııasy bólimshesiniń meńgerýshisi, professor Ǵabıt О́leńbaıdyń aıtýynsha, operasııa óte kúrdeli bolypty. Alyp isik bala mıynyń jartysyna jýyq bóligin alyp jatqan. Qan joǵaltý qaýpi óte joǵary. Zamanaýı ádis-tásilderdi qoldanatyn epti dárigerlerdiń, tolyǵymen jaraqtandyrylǵan ortalyqtyń arqasynda operasııa sátti ótti.
«Jasqa tolmaǵan balaǵa qandaı operasııa jasasań da ońaıy joq. Ásirese, úlken isikti alyp tastaý qıyn. Aqyldasa kele isikti mıkrohırýrgııalyq ádispen alýǵa bekindik. Operasııa jaqsy ótti. Qazir kishkentaı qyzymyz operasııadan keıingi emsharalardan ótip jatyr. О́zin jaqsy sezinedi. Quspaıdy, jaǵdaıy jaqsaryp keledi. Operasııada anestezıologtar men transfýzıologtar da aýqymdy jumys atqarǵanyn aıta ketken jón. О́ıtkeni kishkentaı pasıenttiń jaǵdaıyn baqylaý asqan dáldikti qajet etedi. Topta anestezıolog-reanımatolog Aıgúl Jandeldınova, meıirger-anestezıst Gúlzıra Dáýkenova, transfýzıolog Erbol Qýanyshev jáne operasııa meıirgeri Alýa Dáýkenovalar da boldy», deıdi Ǵabıt О́leńbaı.
