Joba Qazaqstan Respýblıkasynyń Prezıdenti Qasym-Jomart Toqaevtyń tikeleı tapsyrmasy boıynsha júzege asyrylyp, eldiń energetıkalyq jáne kólik táýelsizdigin nyǵaıtýdyń mańyzdy kezeńin bildiredi.
Saltanatty iske qosý rásimine memlekettik organdar ókilderi, onyń ishinde Mańǵystaý oblysynyń ákimi Nurdáýlet Qılybaı, QR Energetıka mınıstrliginiń Munaıdy tasymaldaý jáne óńdeý departamentiniń dırektory Dáýlet Aryqbaev, sondaı-aq «Samuryq-Qazyna» AQ, «QazMunaıGaz» UK AQ jáne CITIC Group seriktesteri qatysty.
Caspi Bitum zaýytynyń jańǵyrtylýy – munaıdy tereń óńdeýdi damytý jáne elimizdi sapaly qurylys materıaldarymen qamtamasyz etý boıynsha QR Úkimetiniń maqsatty saıasatynyń nátıjesi. Joba bir aı buryn aıaqtalyp, ýaqytynan buryn iske qosyldy. Bul memlekettik organdardyń úılesimdi jumysy, jobany tıimdi basqarý, bas merdiger CITIC Construction men barlyq tartylǵan mamandardyń birlesken eńbeginiń arqasynda múmkin boldy.
Jobany iske asyrý jalpyulttyq mańyzǵa ıe. Jańǵyrtý nátıjesinde zaýyttyń jyldyq munaı óńdeý qýaty 50%-ǵa artyp, 1 mıllıon tonnadan 1,5 mıllıon tonnaǵa deıin ulǵaıdy. Bul elimizdegi munaı óńdeý kólemin arttyrýǵa eleýli úles qosady. Eń mańyzdy jetistik – strategııalyq ónim bolyp sanalatyn jol bıtýmynyń óndirisi 50%-ǵa artyp, jylyna 750 myń tonnaǵa jetti. Bul Qazaqstannyń jol qurylysy men jóndeý jumystaryna qajetti sapaly bıtýmǵa degen ishki suranysyn tolyq derlik óteýge múmkindik beredi. Atap aıtqanda, bul «Kúshti óńirler – el damýynyń draıveri» sekildi memlekettik baǵdarlamalar aıasynda jol ınfraqurylymyn damytýǵa serpin beredi. Sonymen qatar, bıtým óndirisiniń artýy ımportqa táýeldilikti azaıtyp, ishki naryqta jetkizilim men baǵanyń turaqtylyǵyn qamtamasyz etedi. Bul – búkil el aýmaǵyndaǵy iri ınfraqurylymdyq jobalardy iske asyrý úshin óte mańyzdy.
– «Caspi Bitum jańǵyrtylǵan zaýytynyń iske qosylýy – bul búkil el úshin strategııalyq mańyzdy qadam. Ol Memleket basshysynyń tapsyrmasyn oryndaý aıasynda Úkimet pen Energetıka mınıstrliginiń erekshe baqylaýynda boldy, – dep atap ótti QR Energetıka mınıstrligi Munaıdy tasymaldaý jáne óńdeý departamentiniń dırektory Dáýlet Aryqbaev. – Otandyq bıtým óndirisiniń 50%-ǵa ósýi joldardy salý men jóndeý qarqynyn jedeldetýge, olardyń sapasy men uzaqmerzimdiligin arttyrýǵa múmkindik beredi. Bul – ınfraqurylymdy damytýǵa, logıstıkany jaqsartýǵa jáne túptep kelgende, qazaqstandyqtardyń ómir sapasyn arttyrýǵa salynǵan tikeleı ınvestısııa. Atalǵan joba – elimizdiń munaı óńdeý jáne munaı-hımııa ónerkásibin uzaq merzimdi damytýǵa baǵyttalǵan memlekettik saıasatqa saı, shıkizattyq baǵyttan tereń óńdeýge kóshýdiń aıqyn úlgisi».
Jańǵyrtý jobasy aıasynda 140 tonna salmaqqa ıe 40 metrlik vakýýmdyq kolonna ornatý, ELOÝ-AVT qondyrǵysyn jańartý, myńdaǵan metr qubyrlar men kabelder tartý, zamanaýı avtomattandyrý júıelerin engizý syndy kúrdeli tehnologııalyq jumystar atqaryldy. Bul – Qazaqstandaǵy ınjenerlik-tehnıkalyq áleýettiń joǵary deńgeıin aıǵaqtaıdy.
Úkimettiń is-qımyl josparyna engizilgen jańǵyrtylǵan Caspi Bitum zaýytynyń iske qosylýy – bul joǵary qosylǵan quny bar ónim óndirýge kóshý jónindegi memlekettik saıasattyń naqty júzege asýynyń kórnekti úlgisi. Sondaı-aq bul joba Qazaqstannyń qurylys materıaldaryn óndirý boıynsha óńirlik kóshbasshy retindegi mártebesin kúsheıtedi.
