Is-sharaǵa Almaty óńirlik garnızonynyń, Ulttyq ulannyń, UQK Shekara qyzmeti akademııasynyń basshylyǵy, Qarýly kúshterdiń ardagerleri, áskerı joǵary oqý oryndarynyń kýrsanttary jáne «Jas sarbaz» áskerı-patrıottyq qozǵalysynyń tárbıelenýshileri qatysty.
Jıyndy Qorǵanys mınıstriniń orynbasary general-maıor Shaıh-Hasan Jazyqbaev ashty.
– Bizdiń ata-babalarymyz osy qarý-jaraq pen áskerı tehnıkamen Máskeý men Lenıngradty qorǵady, Stalıngrad pen Rjev mańyndaǵy qandy shaıqastarǵa qatysyp, Ýkraına men Belarýsti, Baltyq jaǵalaýy men Polshany azat etti, biraz Eýropa elderindegi shaıqastarǵa qatysty. Bul murajaı búgingi býynǵa qazaqstandyq jaýyngerler – Baýyrjan Momyshuly, Saǵadat Nurmaǵambetov, Talǵat Bıgeldınov, Sergeı Lýganskıı, Rahymjan Qoshqarbaev, Qasym Qaısenov, Mánshúk Mámetova, Álııa Moldaǵulova jáne taǵy basqa batyrlardyń surapyl soǵys jyldarynan qalǵan jádigerlerin kórsetetin oryn, – dedi ol.
28 panfılovshylar saıabaǵyna jáne Armııa úıine kelýshiler Uly Otan soǵysy jyldarynda keńes áskerleri qarýlanǵan áskerı tehnıkany, ıaǵnı T-34, T-44, T-55 tankterin, 1931 jylǵy 230 mm gaýbısalaryn jáne «Katıýsha» reaktıvti artıllerııasynyń áıgili BM-13 jaýyngerlik mashınasyn kóre alady.
Bıyl sondaı-aq, Uly Otan soǵysyndaǵy Jeńistiń 80 jyldyǵyna oraı Armııa úıi qalpyna keltirildi. Onyń aldyńǵy jaǵynda jastarǵa áskerı-patrıottyq tárbıe berý úrdisterin kórsetetin zamanaýı barelef ornatylǵan.
Armııa úıiniń ǵımaratynda Ulttyq áskerı-patrıottyq ortalyqtyń fılıaly bar. Ashylǵannan keıin onda balalar áskerı-patrıottyq klýbtary jumys isteı bastaıdy. Konserttik jáne mármár zaldarda, Jaýyngerlik dańq murajaıynda kúrdeli jóndeý júrgizildi. Balalardyń áskerı-patrıottyq fılmderin túsirý úshin úlken zamanaýı kınopavılon quryldy.
– Almaty úshin Armııa úıiniń mádenı mańyzy zor. Ǵımarat sáýlet eskertkishi retinde belgili. Biz qalanyń jáne búkil Qazaqstannyń eń qasıetti kórikti jerleriniń biri retinde onyń taza kelbetin qasterlep, saqtaýǵa mindettimiz, – dep atap ótti Qorǵanys mınıstriniń orynbasary.
