Qaıyrymdylyq bastamasynyń máni – salamatty ómir saltyn ustana otyryp, erekshe balalarǵa qoldaý kórsetý. Aıta keterligi, byltyr marafonnan jınalǵan qarjyǵa erekshe qajettiligi bar balalarǵa arnalǵan 5 ınklıýzııa kabıneti ashylsa, bıyl taǵy da 10 synypty ashý kózdelip otyr. Bul – ulttyq ál-aýqat qorynyń korporatıvtik áleýmettik jaýapkershilik aıasynda qoldaý kórsetetin basym baǵyttarynyń biri.
«Barshamyz birigip ıgi iske atsalystyq. «Samuryq-Kazyna» tobynda áleýmettik jaýapkershilik – korporatıvtik mádenıettiń bir bóligi ǵana emes, ol bizdiń basty adamı qundylyqtarymyzdyń biri. Marafonnan jınalǵan qarjyǵa damýynda ereksheligi bar balalarǵa ınklıýzıvti kabınetterdi ashpaqpyz. Inklıýzıvti bilim – jaýapkershiligi mol, búgingi qoǵamnyń ajyramas bóligi. Sondyqtan bilim alý men damýda barshanyń múmkindikteri teń bolýyna óz úlesimizdi qosamyz», dedi «Samuryq-Qazyna» basshysy Nurlan Jaqypov.
Qor basshysy bıyl da jarysqa belsendi qatysyp, 10 shaqyrym qashyqtyqty baǵyndyrdy.
«Bir ret júgirip ótý, marafonǵa bir márte qatysý – bul jarqyn bolashaqqa qosqan árqaısymyzdyń úlesimiz. Búgingi ıgi is-sharaǵa qatysqan ár janǵa alǵysymyzdy bildiremiz», dedi Nurlan Jaqypov.
Taǵy bir aıta keter jaıt, bıylǵy marafon jınalǵan qarajat pen qatysýshylar sany jóninen rekord ornatty. Máselen, byltyr júgirý jarysyna 1 200 adam qatyssa, bul jyly olardyń sany 3 000-ǵa jetti. Osylaısha, qatysýshylar 5 jáne 10 shaqyrym qashyqtyqqa júgirip, baq synasty. Nátıjesinde, 200 mln teńgege jýyq qarajat jınaldy.
Sonymen birge, «Samuryq-Qazyna» qorynyń ınklıýzııa kabınetterinde bilim alatyn mektep oqýshylary da marafonǵa belsene qatysty. Olar «Meıirimdilik mekeni» arnaıy aımaǵynda júgirýshilermen birge 50 gúl kóshetin otyrǵyzyp, ósimdik ósirýdiń qyr-syryn úırendi. Sóıtip, ár gúl qumyrasy marafonǵa qatysýshylardyń mańyzdy qaıyrymdylyq sharasyna qosqan úlesin eske salatyn rámizge aınaldy. Jetkinshekterdiń ıgi iske qatysýy, olardyń ınklıýzıvti kabınette bilim alý barysynda fızıkalyq jaǵdaıynyń jaqsarǵanyn, qoǵamda áleýmettený jolynda beıimdelgenin baıqatty.
Odan bólek, balalarǵa «Qazaq aýyly» aımaǵynda asyq atý, arqan tartys, bes tas sııaqty ulttyq oıyndar uıymdastyryldy. Marafon barysynda baǵdar boıynda qoldaý kórsetken úzdik kompanııalar da anyqtaldy. «III Charity Samruk Marathon» turaqty qatysýshylarynyń biri – «Qazatomprom» IT-departamentiniń qyzmetkeri, sportshy Dmıtrıı Dokýchaev. Qaıyrymdylyq marafonyna ol osymen úshinshi jyl qatarynan qatysyp otyr.
«Júgirýmen 2022 jyldan beri aınalysamyn. Osy ýaqyt ishinde birneshe ret 5, 10 km jáne jartylaı marafondarda júgirdim. Bul joly marafonǵa qatysýymnyń sebebi de erekshe – jınalǵan qarajattyń barlyǵy balalarǵa kómek kórsetýge jumsalady», deıdi.
«Samuryq-Qazyna» basqarýshy dırektory Aıdar Rysqulov ta 10 km qashyqtyqty 42 mınýtta júgirip ótti.
«Marafon – biz úshin árqashan aýqymy keń mańyzdy oqıǵa. Men júgirýmen 7 jyldan beri aınalysyp kelemin. Osy ýaqyt ishinde birneshe marafonǵa qatystym, onyń ishinde «Ironman», «Almaty marafony» da bar. Búgin óte jeńil júgirdim, jarysty joǵary deńgeıde ótkizgen uıymdastyrýshylarǵa raqmet. Barshańyzdy sportpen shuǵyldanýǵa shaqyramyn», dedi top-menedjer.
Marafonǵa 18 ben 60 jastan joǵary jas aralyǵyndaǵy belsendi azamattar qatysty. Osylaısha, áıelder arasynda 18-29 jas aralyǵy boıynsha Dına Afanaseva, Ánel Qydyrbekova men Malıka Rahymbaeva jeńimpaz atandy. Dál osy qashyqtyqta erler arasynda Baǵdat Ámen, Albert Valınýrov pen Vladımır Kýıanıchenko jeńis tuǵyrynan kórindi.
Sol sııaqty qaıyrymdylyq is-sharasyna jasy 60-tan asqan zeınetkerler de qatysty. Salamatty ómir saltyn ustanatyn júgirýshiler óz jastaryna qaramastan, 5 jáne 10 km qashyqtyqty abyroımen júgirip ótti. Máselen, 5 km qashyqtyqta erler arasynda Hamet Seraev, Ǵalıolla Ysqaqov, Shahımýrat Jarýllaev jeńimpaz atansa, áıelder arasynda Maıgúl Jarýllaeva, Aıgúl Baıtýrova men Sálıma Moltabaeva máre syzyǵyn alǵash úshtikte kesip ótti.
Dál osylaı qatysýshylar 10 km qashyqtyqty da baǵyndyrdy. Osylaısha, 18-29 jas aralyǵynda Ýlıana Chýgaı, Dıana Zeınýllına, Nurǵaısha Ramazanova jeńimpazdar qatarynan kórinse, 30-39 jas aralyǵynda Araılym Shegebaeva, Nazym Serikbaeva, Aına Úsenovalar úzdik dep tanyldy.
Erler arasynda mundaı qashyqtyqta Danııar Shúlkebaev, Jasulan Dáýletbekov, Bekzat Qalelov (18-29 jas) top jarsa, Erkebulan Ahmadıev, Arman Ǵalymov, Rústem Saǵadıev (30-39 jas) óz jas aralyǵy boıynsha úzdikter qatarynan kórindi.
Eske sala keteıik, byltyr «Charity Samruk Marathon»-yna 127 mln teńge qarjy jınalǵan edi. Bul qarajatqa elordanyń 5 mektebinde ınklıýzııa kabınetteri ashylǵan. Búginde qor kompanııalar tobynyń atynan 11 ınklıýzııa synyby ashylyp, onda 500-den astam erekshe bala bilim alyp jatyr. Kabınetterde logoped, defektolog, psıholog mamandar jumys isteıdi. Sonymen birge, sheberhanalar men emdik deneshynyqtyrý zaldary da bar. Olar balalardyń tolyqqandy damýy men bilim alýy úshin barlyq qajetti quraldarmen jabdyqtalǵan. Jalpy, qor jyl saıyn 700 000-nan astam azamatqa kómek kórsetedi.
Maınur Janaqova
