Podkastty dástúrli túrde Senat tóraǵasy Máýlen Áshimbaev júrgizip otyrdy. Talqylaýǵa Saýda jáne ıntegrasııa mınıstri Arman Shaqqalıev, «Shın-Laın» kompanııalar tobynyń prezıdenti Andreı Shın jáne KPMG Kavkaz jáne Ortalyq Azııa seriktesi Bolat Myńbaev qatysty.
Talqylaý barysynda qatysýshylar AQSh-tyń proteksıonıstik saıasaty men jahandyq logıstıkalyq tizbektegi ózgeristerden bastap otandyq óndirýshilerdiń syrtqy naryqtardaǵy pozısııalaryn nyǵaıtýdy kózdeıtin naqty qadamdarǵa deıingi taqyryptarǵa jan-jaqty toqtaldy.
Senat tóraǵasy atap ótkendeı, Qazaqstan eksportqa baǵdarlanǵan el bolýy kerek. Al otandyq kompanııalar jahandyq oıynshylarǵa aınalýy qajet.
«Kompanııalarymyz damyp, ekonomıkalyq, ınnovasııalyq, tehnologııalyq turǵydan kóshbasshylardyń biri bolýymyz úshin biz jańa naryqtardy ıgerýimiz kerek. Qazirgi múmkindikterdi árdaıym nazarda ustaý qajet. Sondaı-aq memlekettiń otandyq kompanııalarǵa sol múmkindikterdi paıdalanýǵa qoldaý kórsetýi asa mańyzdy. Memlekettik qoldaý túsinikti, tıimdi bolýǵa jáne otandyq óndirýshilerdiń sheteldik naryqtaǵy ornyn nyǵaıtýǵa yqpal etýge tıis», dedi M.Áshimbaev.
Podkast barysynda saýda baılanystary men eksporttyq strategııalardy keńeıtý jóninde kásibı usynystar da aıtyldy. Buǵan qosa qosylǵan quny bar ónim úlesin ulǵaıtý, ishki úzdiksiz óndiristi qamtamasyz etý men turaqty eksporttyq ınfraqurylymdy qalyptastyrý máseleleri sóz boldy. Podkastyń tolyq nusqasyn YouTube-taǵy Taldau Talks arnasynan kórýge bolady.
