Shahmet Qusaıynov atyndaǵy Aqmola oblystyq qazaq mýzykalyq-drama teatrynda Málik Ǵabdýllın mýzeıiniń uıytqy bolýymen ótkizilgen, rýhanı reńi ózgeshe sharanyń negizgi maqsaty elimizdegi tulǵalyq mýzeılerdiń ózara baılanysyn nyǵaıtý, uly tulǵalardyń ómiri men shyǵarmashylyǵyn, ultqa sińirgen eńbegin nasıhattaý. Is-sharaǵa Qostanaı oblysyndaǵy Ybyraı Altynsarınniń, «Jangeldın murajaılar kesheni», Ahmet Baıtursynuly men Mirjaqyp Dýlatulynyń, Almaty oblysynan Jambyl Jabaevtyń, Muqaǵalı Maqataevtyń, Aqtóbeden Keńes Odaǵynyń Batyry Álııa Moldaǵulovanyń, Aqmola oblysyndaǵy Ilııas Esenberlınniń, Soltústik Qazaqstan oblysynan Abylaı han rezıdensııasynan ujymdary keldi.
–Alash ardaqtylarynyń esimderimen atalatyn mýzeılerdegi qundy jádigerler, tyń derekterden jas tolqyn mol maǵlumat alyp, kókiregindegi tanym kókjıegin keńeıtedi, – dedi saltanatty jıynda oblys ákiminiń orynbasary Dosulan Aıtbaev.
Festıval-baıqaýdyń erejesine sáıkes alǵashqy aınalymda sahnalyq qoıylym kórsetilip, tulǵalardyń obrazy somdalsa, ekinshi aınalymda er Máliktiń ómiri men shyǵarmashylyǵyna qatysty sanalýan suraqtarǵa jaýap berdi. Sońǵy kezeńde tulǵalyq mýzeılerde saqtalǵan eń qundy jádigerlerdiń tarıhy baıandaldy. Festıval aıasynda ótken baspasóz máslıhatynda qalam ustaǵan qaýym elimizdegi mýzeılerdiń jumysyna, onyń menedjmentine, shalǵaıdaǵy shaǵyn aýyldarǵa jyljymaly kórme aparý jaıy týraly suraqtaryn qoıdy. Shyntýaıtynda kóptegen mýzeıler qalada. Qala balalary rýhanı azyq ala alady, al, aýyldaǵy jetkinshekter she? Mine, osyndaı mańyzdy máseleler kóterildi. Ulttyq bolmys, ar-namys, adamgershilik qasıetter anyq qylań bergen osyndaı rýhanı álemimizdi nurlandyratyn ádemi mádenı oqıǵalardyń jıi bolǵany jarasymdy. Áıtpese áleýmettik jelige janary baılanǵan jurt elimizdiń ótkenin, ult úshin qurban bolǵan erlerdiń qaıratkerligin bile ala ma? Osy jolǵy keshte mol maǵlumat aıtyldy.
Qazylar alqasynyń sheshimimen Almaty oblysynyń M.Tynyshbaev atyndaǵy tarıhı-ólketaný mýzeıiniń fılıaly, Jambyl Jabaevtyń ádebı-memorıaldy mýzeıi birinshi orynǵa ıe bolsa, Aqtóbeden kelgen Álııa Moldaǵulova atyndaǵy oblystyq mýzeı ujymy ekinshi orynǵa ıe boldy. Qostanaı oblysyndaǵy «Jangeldın murajaılar keshenine» qarasty Ahmet Baıtursynuly men Mirjaqyp Dýlatulynyń mýzeıi úshinshi orynǵa laıyq dep tanyldy. Festıvalge qatysýshylardyń barlyǵyna yntalandyrý syılyqtary tabys etildi.
Kókshedegi Kenjebaı Muqyshev basshylyq etetin Málik Ǵabdýllın atyndaǵy mýzeı ujymy mazmuny mol sharany tek qana demeýshilerdiń kómegimen sátti ótkizdi.
Kókshetaý
