Densaýlyqqa demeý joba

Eńbek jáne halyqty áleýmettik qorǵaý mınıstrligi, Áleýmettik qorǵaý salasyn damytýdyń ulttyq ǵylymı ortalyǵy (ÁQSDUǴO) men «Qazaqstan halqyna» qory arasyndaǵy úshjaqty memorandýmǵa qol qoıyldy. Sonyń aıasynda 4 óńirde (Abaı, Qyzylorda, Pavlodar oblystary men Shymkent qalasy) «Múgedektigi bar balalardy úı jaǵdaıynda ońaltý» qanatqaqty jobasy iske asyrylyp keledi. Ilkimdi jobanyń tıimdiligi sol, ońaltýdyń ınnovasııalyq tehnıkalyq quraldary erekshe balasy bar otbasyna aqysyz negizde jalǵa beriledi.

«Qazaqstan halqyna» QQ ońaltýdyń ınnovasııalyq 1 309 tehnıkalyq quralyn satyp alýdy josparlap otyr. 2024 jyldyń tamyzynda alǵashqy lekte ońaltýdyń ınnovasııalyq 400 teh­nıkalyq quraly elge ákelindi. Sondaı-aq jobany iske asyrý sheń­berinde ÁQSDUǴO fılıaldarynyń maman­daryn, ońaltýdyń ınnovasııa­lyq tehnı­kalyq quraldaryn alǵan balalardyń ata-analaryn úıde ońaltý is-sharalaryn júrgizý jóninde oqytý júrgiziledi. Shymkent qalasynda ÁQSDUǴO fılıaly bazasynda «Aıaq-qoldy jattyqtyrýǵa arnalǵan «Thera-trainer tigo Pediatric» trenajerin praktıkalyq qoldaný» semınary ótti. Eki kúndik is-shara barysynda Reseıden kelgen dáriger-reabılıtolog, «Beka Rýs» kom­panııasynyń ókili Devıd Ernandes tájirıbesimen bólisti.

«Trenajerdiń ártúrli jattyǵý baǵdarlamasy ár pasıent úshin ońtaıly bolyp otyr. Nátıjesinde, balalardy ońaltý qysqa merzimde aıaqtalady. Munda ár baǵdar­lamalyq jattyǵýdyń birneshe profıli usynylady: neıro, orto, kardıo, ızokınetıka. Ońaltýdyń ınnovasııalyq tehnıkalyq quraldaryn bermes buryn ata-analardy oqytý 10 kúnge deıin júrgiziledi, sodan keıin trenajer balanyń turǵylyqty jerine jetkiziledi ári ony mamandar em alýshynyń densaýlyq jaǵdaıyna qarap bóledi. Ata-analarǵa ońal­tý­dyń ınnovasııalyq-teh­nıkalyq quraldarymen ju­mys isteý algorıtmi taǵy bir ret kórsetilip, mobıldi qo­symsha arqyly sabaqtarǵa kún­delikti monıtorıng júr­giziledi», deıdi ÁQSDUǴO bas dırektorynyń orynbasary Sholpan Bólekbaeva.

«Múgedektigi bar balalardy úı jaǵdaıynda ońaltý» jobasy negizinen júıke júıe­siniń aýrýlarymen, sonymen qatar tirek-qımyl apparatynyń buzylýy­nan japa shekken naýqas­tardyń áleýetin arttyrýǵa baǵyttalǵan. Qyzylorda qala­synyń turǵyny Maral Ádilhan osy joba aıasynda alǵan tirek-qımyl apparat­tarynyń ıgiligi mol ekenin ­aıtady.

«О́zim de dárigermin. Qyzymyz Safýra Covid-tiń órship turǵan shaǵynda ómirge keldi. Týǵannan ınfeksııanyń kesirinen damýynda kinárat boldy. Jaqynda bes jasqa tolady, áli moınyn tik ustaı almaıdy. Safýradan úlken úsh balamyzdyń deni saý. Mundaı synaqty basymyzǵa salǵan soń, kóndik. Únemi túrli emdeý ortalyqtaryna shıpa bolsyn dep aparyp júrmiz. Eki jyl buryn osy joba júzege asady degende qatty qýandyq. Sebebi tirek-qımyl apparattary, sal aýrýyna shaldyqqan  bala­lardyń otyrýyna óte yń­ǵaıly arbalardy satyp alýǵa kóp adamnyń qaltasy kóter­meıdi, óte qym­bat. Biz de qyzy­myz úshten asqan soń, ári-beri júrgenge jaıly bolsyn dep arba izdedik. Osy ilkimdi jobanyń ıgiligin kórip, arba berdi. Qy­zy­myz arbaǵa otyrǵaly basyn ustaıtyn boldy. Emdik jattyǵý tásilderin qoldaný­dyń arqasynda oty­rý­ǵa da beıimdelip keledi. Qaladaǵy erekshe balasy bar ata-analar ara-tura maman­dardy shaqyrtyp, osy tehnıka­­­lyq quraldardy qalaı qol­daný qajettigin úıretti», deıdi M.Ábilhan.

Qanatqaqty jobanyń tıimdi­ligi óte joǵary. Maral Ábilhan bes jylǵa jýyq tek jatatyn qyzynyń otyrýǵa talpynyp, arqasyn tikteı bastaǵanyna «Múgedektigi bar balalardy úı jaǵ­daıynda ońaltý» jobasy orasan septigin tıgizgenin aıtty.

«Safýranyń otyrsam degen talpynysy qýantady. Oty­rýǵa yńǵaıly arba­nyń artyq­shylyǵy mol. 4 aı­dan astam ýaqyt arbada otyryp, moıny qataıyp, arqasyn tikteýge daǵdylanyp qal­dy. Endi biz arbany ótkizip, ornyna vertıkalızator appara­tyn alsaq deımiz. Bul qu­rylǵy arqa omyrt­qa­sy­nyń túzelýine, balanyń óz aıaǵymen qadam basýyna septigin tıgizedi. Vertıkalızator apparatyn sheshkennen keıin júris tiregin (hodýnkı) beredi. Osylaısha, kezeń-kezeńimen júrgiziletin keshendi emdik sharanyń nátıjesinde sal bolyp jatyp qalǵan bala­nyń on eki múshesine jan bitedi. Bul jobany júzege asyrýshylarǵa, qar­jylaı qoldaý kórsetken jan­darǵa zor alǵys aıtamyz», deıdi M.Ábilhan.

Shymkenttik 11 jastaǵy Aıan Qasymbekuly da osy úı jaǵdaıynda ońaltýdyń sharapatyn kórip keledi. Aıan­nyń ómirge kelgenine 35 kún bolǵanda mıyna qan quıylyp, damýy, ósip-jetilýi tejelgen. Anasy Gúlbaný Tólepbergenova uly­nyń ımmýnıteti tym tómen ekenin, tumaýratsa da em-domǵa keri áser etetinin málim etti.

«Biz byltyr osy joba arqy­ly alty aıǵa jýyq merzimge oryndyq-arba aldyq. Sheteldik mamandar balamyzdyń dıag­no­­zymen tanysqan soń, quryl­ǵy­nyń baǵdarlamasyn bizge ıkemdi etip berdi. Arqa omyrt­qa­sy qısaıǵan edi, túzelýine aıtarlyqtaı septigin tıgizdi. Aıanǵa osy arbada otyryp tamaq­ta­nýǵa, muǵa­limder úıge kelip sabaq ótkende otyryp oqýyna óte yńǵaıly boldy. Jaqynda qadam basýǵa talpynsyn dep oryndyq-arbany ótkizip, vertıkalızator quryl­ǵy­syn aldyq. Onyń da septigi tıip keledi. «Ońal­tý baǵytynda qabyldaǵan emdik sharanyń oń nátıjesi baı­qa­lyp, kóńilimiz jaılandy», degen ana tuńǵysh balasynyń qaz basyp aıaqqa turyp ketýi úshin áli uzaq merzim em alatynyn aıt­ty.

Áleýmettik qorǵaý salasyn damytýdyń ulttyq ǵylymı ortalyǵy keleshekte ilkimdi jobany ózge oblystarda da júzege asyrýdy josparlap otyr.