Jıyndy Premer-mınıstrdiń orynbasary Ermek Kósherbaev ashyp, Úkimet atynan qatysýshylardy quttyqtap, Qazaqstan men Vetnam arasyndaǵy ekonomıkalyq baılanystardy nyǵaıtýdyń mańyzyna toqtaldy.
«Qazaqstannyń Vetnam – Ońtústik-Shyǵys Azııadaǵy negizgi seriktesteriniń biri. Ekijaqty saýda-ekonomıkalyq qatynastardy keńeıtýge zor áleýet bar. О́tken jyly eki el arasyndaǵy taýar aınalymy 860 mıllıon dollarǵa jetti», dedi vıse-premer.
Búginde Qazaqstanda vetnamdyq kapıtaldyń qatysýymen túrli salalarda 13 kompanııa jumys isteıdi. Bul elimizdiń qolaıly ınvestısııalyq ahýalyna degen senimniń joǵary deńgeıin aıǵaqtaıdy, turaqty ári ónimdi áriptestiktiń qalyptasqanyn kórsetedi.
Yntymaqtastyqtyń bolashaǵy, eń aldymen, avıasııa salasymen baılanysty. Forým aıasynda «Qazaq Air» men «VietJet» kompanııalary «VietJet Qazaqstan» atty birlesken brendti iske qosý týraly kelisimge qol qoıdy.
«Sovico Group» pen «VietJet Air» kompanııalarynyń «Qazaq Air» qyzmetin basqarýǵa ári ony jańa «VietJet Qazaqstan» brendimen damytýǵa nıetti ekenin joǵary baǵalaımyz. Áýe jelisiniń keńeıýi kólik qatynasyn arttyryp, óńirde ekonomıkalyq ósimniń jańa núktelerin qalyptastyrady», dedi «Samuryq-Qazyna» AQ basqarma tóraǵasy Nurlan Jaqypov.
Yntymaqtastyqtyń taǵy bir mańyzdy baǵyty – aýyl sharýashylyǵy. Qazaqstan egistik pen jaıylymdyq jer kólemi boıynsha álemde altynshy orynda tur jáne bıdaı men un eksportynda kóshbasshy elderdiń qatarynda.
«Aldaǵy úsh jylda agroónerkásip kesheninde óńdelgen ónim úlesin 70%-ǵa jetkizýdi kózdep otyrmyz. Bul maqsatta 220 myń tonna et óndiretin 29 qus fabrıkasy men 850 mln jumyrtqa óndiretin 11 fabrıka iske qosylmaq. Vetnamdyq seriktesterdi birlesken óndiris qurýǵa jáne sý únemdeıtin zamanaýı tehnologııalardy engizýge shaqyramyz», dedi E.Kósherbaev.
Kezdesý barysynda sıfrlandyrý men ınnovasııalyq yntymaqtastyqqa da erekshe nazar aýdaryldy. Qazaqstan elektrondyq úkimettiń jahandyq ındeksi boıynsha 24-orynda, al onlaın qyzmet sapasy jaǵynan álemdegi úzdik on eldiń qataryna kiredi. О́z kezeginde IT salasynda jetekshi elderdiń biri sanalatyn Vetnam memlekettik qyzmetterdi sıfrlandyrý, jasandy ıntellektini engizý jáne tehnologııa almasý boıynsha Qazaqstan úshin strategııalyq seriktes bola alady.
Jıyn jańa jobalardy bastaýǵa arnalǵan mańyzdy alańǵa aınaldy. Aldaǵy ýaqytta usynylǵan bastamalar B2B formatynda jáne vedomstvoaralyq deńgeıde egjeı-tegjeı talqylanyp, naqty nátıjelerge baǵyttalmaq. Qazaqstan Úkimeti jobalardy barlyq kezeńde jan-jaqty qoldaýǵa daıyn ekenin bildirdi.
