Foto: Almaty qalasynyń ákimdigi
Naýryz-sáýir aılarynda qalada bıiktigi 6 metrden asatyn 2 myńnan astam iri aǵash otyrǵyzylǵan. Bul kóshetter Germanııa (lıpa), Túrkııa (kúl, qaraǵash, úıeńki) jáne Reseı (shyrsha, qaraǵaı) elderinen arnaıy jetkizilgen. Sonymen qatar, ótemdik ekpeler sheńberinde bıiktigi 2,5 metrden asatyn 15 myń kóshet otyrǵyzyldy.
Qalada abattandyrý jumystary aıasynda Dostyq dańǵyly men Pýshkın kóshesi «qasbetten qasbetke deıin» qaǵıdaty boıynsha tolyq abattandyrylady. Bul joba Almatyda alǵash ret júzege asyp otyr. Qurylys jumystaryn júrgizetin merdiger uıymdy anyqtaý úshin konkýrstyq rásimder 30 sáýirde bastalyp, 2025 jyldyń qarashasynda aıaqtalady dep josparlanǵan.
Sondaı-aq sáýir aıynda uzyndyǵy 33,6 shaqyrym bolatyn 16 kóshe ýchaskesinde keshendi abattandyrý jumystary aıaqtalǵan. Aýlalardy jańartý jumystary da qolǵa alynyp, 1 sáýirden bastap bastalǵan joba boıynsha jyl sońyna deıin josparlanǵan 470 aýlanyń 426-syn abattandyrý kózdelgen.
Jalpy Almatyda 4 316 aýla bar, onyń ishinde sońǵy úsh jyl ishinde 1 176 aýla retke keltirilgen. Bul jumystar qalanyń ekologııalyq jaǵdaıyn jaqsartýǵa jáne turǵyndardyń ómir súrý sapasyn arttyrýǵa baǵyttalǵan.
