Foto: gov.kz
Erke Baıǵabylova Astanada jumys isteıdi. Buǵan deıin jumys isteıtin jastarǵa arnalǵan jalǵa beriletin baspana baǵdarlamasyna qatysyp, bes jyl boıy memleket bergen páterde turǵan. Onyń aıtýynsha, dál osy ýaqyt óz úıin satyp alýǵa alǵyshart bolǵan.
«Men «Elorda jastary» baǵdarlamasy týraly «Otbasy» bankiniń ókilderi arqyly bildim. Meni birden onyń sharttary qyzyqtyrdy. Bar bolǵany 10% bastapqy jarna jáne jyldyq 5% tómen paıyzdyq mólsherleme. Bul tıimdi boldy», deıdi Erke Baıǵabylova.
Jaldaý merzimi aıaqtalǵan kezde aqshasyn da jınap úlgergen. Jalǵa berilgen páterde turǵan bes jylda óz páterin satyp alý úshin qarjylyq negizin qalaǵan. Astana turǵyny múmkindigin jibermeı, qujat tapsyrýdy jón kórgen.
«Baǵdarlama óte tıimdi boldy. Bank menedjerleriniń ótinish berýden bastap sońyna deıingi barlyq kezeńde bizben birge bolǵany erekshe qýantty. Bul maǵan senimdilik berip, búkil prosesti aıtarlyqtaı jeńildetti», deıdi ol.
Qazir Erke otbasymen birge óz páterinde turyp jatyr jáne «Elorda jastary» baǵdarlamasy kóptegen jastarǵa mańyzdy qadam jasaýǵa múmkindik beretinin aıtty.
Aıta keteıik, «Elorda jastary» baǵdarlamasy 34 jasqa deıingi jastarǵa jeńildikpen nesıe berýdi usynady. Nesıeniń maksımaldy somasy 20 mln teńgege deıin, mólsherlemesi – jyldyq 5%, bastapqy jarnasy – 10%. Turǵyn úıdi bastapqy jáne qaıtalama naryqtan satyp alýǵa bolady.
