Aqjaıyq aýdanynyń maıdangerleri jaıly alǵashqy jınaq 2010 jyly jeńistiń 65 jyldyǵyna oraı «Maıdangerler» men «Bozdaqtar» atty eki tom bolyp jaryq kórgen bolatyn. Qos kitapqa 4000 bozdaq pen 2000 maıdangerdiń esimi endi. Al tarıhqa kelsek, burynǵy Chapaev jáne Taıpaq aýdandarynan maıdanǵa 11800 adam attanǵan eken. Endeshe talaı esim kitapqa enbeı qalǵany aqıqat. Kitap avtory – belgili ólketanýshy, Aqjaıyq aýdanynyń Qurmetti azamaty, jıdashy-qalamger Baqtyǵalı Qospaev araǵa 15 jyl salyp qaıta basylǵan bul jınaqta arhıv qujattary negizinde kóptegen tyń málimet qosylǵanyn aıtady.
Jańa jınaqtyń tusaýkeser sharasyna Aqjaıyq aýdanynyń ákimi Murat Serdalın, eńbek ardagerleri, zııaly qaýym ókilderi jáne oqyrmandar qatysty. Qundy kitaptyń lentasyn aýdan basshysy men tyl jáne eńbek ardageri Ǵılaj Luqpanov kesti.
Kitap eki taraýdan turady. Onyń birinde aýdan aýmaǵynan maıdanǵa attanǵan sarbazdar týraly derek qamtylǵan. Buryn Chapaev aýdanynyń quramynda bolǵan Saryómir aýylynyń 350 jaýyngeri birinshi ret kirip otyr. Al ekinshi taraýda UOS ardagerleriniń, olardyń ul-qyzdarynyń soǵys týraly estelikteri, soǵystyń oty sharpyǵan Orda aýdanynan kóship kelgen halyqtyń jazbalary, jaýyngerlerdiń maıdanda jazǵan kúndelikteri qamtylǵan. Sonymen birge kitapta áskerı qujattar, sarbazdardyń marapat qaǵazdary da jaryq kórgen.
Batys Qazaqstan oblysy
