Ashylý rásimi taqyryptyq kórmeni aralaýdan jáne qatysýshy komandalardyń saltanatty sherýinen bastaldy. Memlekettik Gımn oryndalyp, qatysýshylar Uly Otan soǵysynda qaza tapqandardy bir mınýt únsizdikpen eske aldy. Erekshe rýhanı áser qaldyrǵan sát – Qazaqstannyń halyq ártisi Doshan Joljaqsynovtyń bergen batasy boldy.
Almaty oblysynyń ákimi Marat Sultanǵazıev óz quttyqtaý sózinde marafonnyń mán-mańyzyn atap ótti:
«Uly dala joryǵy – bul jaı ǵana sporttyq jarys emes. Bul – urpaqtar arasyndaǵy rýhanı sabaqtastyqty jalǵap, tarıhı jadymyz ben ulttyq rýhty jańǵyrtatyn mańyzdy alań. Biz osy marafon arqyly ata-babalarymyzdyń baı mádenıetin dáriptep, óńiraralyq jáne halyqaralyq yntymaqtastyqty nyǵaıtamyz».
«Amanat» partııasynyń atqarýshy hatshysy Dáýlet Káribek jobanyń Memleket basshysy Qasym-Jomart Toqaevtyń bastamalaryna saı keletinin atap ótti:
«Ulttyq sport túrleri men mádenı murany damytý – memlekettik saıasattyń basym baǵyttarynyń biri. “Uly dala joryǵy” – qazaq órkenıetiniń baılyǵy men qonaqjaı dástúrin álemge pash etetin biregeı joba».
Senator, «JORYQ» federasııasynyń qurmetti prezıdenti Darhan Qydyráli jobanyń tereń tarıhı mańyzyn aıryqsha atap ótti:
«Uly dala joryǵy – bul jaı ǵana báıge emes, ata-babalar júrip ótken jolmen qaıta sapar shegetin tarıhı ekspedısııa. Bul – kóshpeli órkenıettiń rýhyn seziný, ýaqyttar arasyndaǵy baılanysty nyǵaıtý jáne ulttyq murany keler urpaqqa amanattaý».
«JORYQ» federasııasynyń prezıdenti Baqytjan Turlybekov qatysýshylarǵa sáttilik tiledi.
Bıylǵy marafonǵa 19 komanda qatysýda: onyń 13-i – Qazaqstan óńirlerinen, al 6 komanda shetelderden kelgen. Olar – Ońtústik Afrıka Respýblıkasy, Vengrııa, Iran, Qyrǵyzstan jáne Tatarstan (RF). Qatysýshylarǵa bes kún ishinde 500 shaqyrymdyq dala jolyn eńserý mindeti tur.
