Oblys ákimi jambyldyq Uly Otan soǵysy ardagerlerine el Prezıdenti Qasym-Jomart Toqaevtyń quttyqtaý haty men «Uly Otan soǵysyndaǵy Jeńiske 80 jyl» merekelik medalin saltanatty túrde tabystady.
Erbol Qarashókeev aldymen 99 jastaǵy Mútálip Erejepbaevtyń shańyraǵynda boldy. Talas aýdanynyń týmasy 1944 jyly ásker qataryna shaqyrylyp, Jeńisten keıin áıgili Brest qalasyn qalpyna keltirýge qatysqan. 1950 jyly elge oralyp, partııa jumystaryna belsene aralasyp, jýrnalıstıka salasynda jemisti eńbek etken. II dárejeli Otan soǵysy ordeni men túrli medaldarmen, qurmet gramotalarymen marapattalǵan. Shyǵarmashylyqty janyna serik etken qarııanyń birneshe jınaǵy jaryq kórgen. Búginde ómirlik serigimen birge urpaǵynyń ortasynda, nemere-shóberesiniń qyzyǵyna bólenip otyr.
Budan soń óńir basshysy Gennadıı Ivanovty quttyqtady. Gennadıı Ivanov 1926 jyly dúnıege kelgen. 1943 jyly nebári 17 jasynda Qyzyl Armııa qataryna alynyp, 1945 jyldyń maýsym aıyna deıin maıdan shebinde jaýyngerlik erlik kórsetken. Soǵystan keıin áskerı qyzmetin jalǵastyrǵan. Zapasqa shyqqan soń pedagogıkalyq ınstıtýtty aıaqtap, uzaq jyl boıy qala mektepterinde matematıka páninen sabaq bergen. II dárejeli Otan soǵysy ordeni jáne 12 merekelik medalmen marapattalǵan.
Sońyra Erbol Qarashókeev Shaldanbaı Shanbaev, Ivan Makeev jáne Grıgorıı Nesheretnevke de Memleket basshysynyń quttyqtaýyn jetkizip, merekelik marapattaryn tabystady.
Jambyl oblysy
