Foto: Ashyq derekkóz
Tramptyń aıtýynsha, AQSh-ta dári-dármektiń quny basqa eldermen salystyrǵanda birneshe ese qymbat, keıde tipti 5–10 esege deıin joǵary. Ol bul jaǵdaıdy «uzaq jyldar boıy túsindirý qıyn ári uıatty jaǵdaı» dep baǵalady.
«Farmasevtıkalyq kompanııalar zertteý men ázirleýge ketken shyǵyndardy jeleý etip, barlyq aýyrtpalyqty tek AQSh azamattaryna artyp keldi. Biraq bul aqtalatyn is emes», dedi ol.
Ol sondaı-aq farmkompanııalardyń saılaý naýqanyna jasaıtyn demeýshiliginiń ózine jáne Respýblıkashyl partııaǵa áser etpeıtinin aıtty.
«Biz ádiletti sheshim qabyldaımyz. Erteń tańǵy saǵat 9:00-de Aq úıde el tarıhyndaǵy eń mańyzdy jarlyqtardyń birine qol qoıamyn. Bul jarlyqtyń nátıjesinde reseptýralyq dári-dármekter men ózge de farmasevtıkalyq ónimderdiń baǵasy 30–80%-ǵa deıin tómendeıdi», dep málimdedi Tramp.
Tramp bul bastamany «AQSh-taǵy ádilettilikti qalpyna keltirý jolyndaǵy alǵashqy qadam» dep atap, amerıkalyqtardyń densaýlyq saqtaý shyǵyndary buryn-sońdy bolmaǵan deńgeıde azaıatyndyǵyna ýáde etti.
Fox News málimetinshe, bul jarlyq Densaýlyq saqtaý jáne áleýmettik qyzmetter mınıstrligin Medicare baǵdarlamasy boıynsha dári-dármek baǵasyna qatysty farmasevtıkalyq kompanııalarmen tikeleı kelissózder júrgizýge mindetteıdi. Aıta keteıik, atalǵan baǵdarlama Baıden ákimshiliginiń ınflıasııany tómendetý týraly zań aıasynda qabyldanǵan bolatyn.
