Is-shara aıasynda birneshe sessııa ótti. Onda sıfrlyq tehnologııalar, qarjy sektoryndaǵy trendter, ýrbanıstıka jáne «jasyl» ekonomıka máseleleri talqylandy. Forýmǵa qatysýshylarǵa Kazatomprom, QazaqGaz, ERG, BI Development, Transtelecom, Cerebra AI, Forte Bank, AIX, Presight AI Kazakhstan, Qazaqstan Venture Group jáne basqa da iri kompanııalardyń jobalary tanystyryldy. BAÁ tarapynan da Masdar, AMEA Power, SMARTWATT, Abu Dhabi Commercial Bank, Dubai Science Park, TECOM Group sııaqty jetekshi kompanııalardyń jetistikteri baıandaldy.
Forýmnyń ashylý saltanatynda QR Saýda jáne ıntegrasııa mınıstri Arman Shaqqalıev, BAÁ Syrtqy saýda mınıstri doktor Tanı bın Ahmed Ál Zeıýdı, «Atameken» UKP Qazaqstannyń syrtqy saýda palatasynyń basqarma tóraǵasy Murat Qarymsaqov pen BAÁ Saýda-ónerkásip palatalary federasııasynyń Bas hatshysy Hýmaıd ben Salem aıtýly jnıyǵa qatysýshylarǵa iltıpat sózin jetkizdi.
QR Saýda jáne ıntegrasııa mınıstri Arman Shaqqalıev Qazaqstannyń aldynda BAÁ-men ekijaqty taýar aınalymyn 1 mlrd dollarǵa deıin jetkizý boıynsha naqty maqsaty turǵanyn atap ótti.
«Biz bet alǵan naqty baǵdar - eksportty ártaraptandyrý jáne yntymaqtastyqty keńeıtý. Qazaqstan aıtarlyqtaı eksporttyq áleýetke ıe, agroónerkásiptik keshende ósimdik maılary, qoı eti, mal azyǵy, bıdaı jáne t.b. sııaqty ónimder boıynsha áleýet 96 mln dollardan asady. Metallýrgııalyq ónimder 250 mln dollardan astam ósimdi qamtamasyz ete alady. О́sý áleýeti 19 mıllıon dollarlyq hımııa ónerkásibinde – eń aldymen polıpropılen segmentinde, sondaı-aq eksport kólemi 30 mıllıon dollardan asatyn mashına jasaý isinde aıtarlyqtaı múmkindikter ashylýda. Mıneraldy tyńaıtqyshtardy, qurylys jáne munaı servıstik qyzmetterin eksporttaýda, sondaı-aq aqparattyq tehnologııalar salasynda qosymsha áleýet bar», - dedi ol.
О́z sózinde BAÁ Saýda-ónerkásip palatalary federasııasynyń Bas hatshysy Hýmaıd ben Salem bylaı dep atap ótti:
«Kóp jyldan beri bizdiń elderimizdi ózara senim, qurmet pen progreske negizdelgen tereń dıplomatııalyq jáne saýda baılanystary biriktiredi. Búgin biz qol jetkizgen tabystardy ǵana emes, sonymen qatar alda turǵan tamasha múmkindikterdi de atap ótýdemiz. Bizdiń ekonomıkalyq baılanystarymyz jyl saıyn nyǵaıyp keledi, bul – energetıka, saýda, ınfraqurylym, tehnologııalar jáne turaqty damý sııaqty mańyzdy salalarǵa salynǵan ınvestısııalardyń nátıjesi».
Sessııalarmen qatar qarjylyq, energetıkalyq, taý-ken, high tech, medısına jáne basqa da salalary boıynsha eki eldiń bıznes ókilderi arasynda B2B formatynda birqatar kezdesýler uıymdastyryldy.
Qazir AHQO-da BAÁ-den 46 kompanııa tirkelgen, olar qarjy jáne saqtandyrý, ǵylymı jáne tehnıkalyq qyzmet, aqparattyq-kommýnıkasııalyq tehnologııalar, saýda, kólik, óńdeý jáne taý-ken óndirý ónerkásibi jáne basqa da salalarda jumys isteıdi.
Forým qatysýshylaryna qazaqstandyq jáne arab kompanııalardyń bıznes-jobalary tanystyryldy. Sonyń ishinde, Presight AI Kazakhstan kompanııasy bar. Arabtyq G42 tobyna kiretin bul kompanııa jasandy ıntellekt jáne sıfrlyq taldaý salasyndaǵy ozyq sheshimdermen aınalysady, kompanııa 2023 jyldan bastap Qazaqstanda jumys isteıdi jáne ol AHQO-da tirkelgen. Qazir Presight AI Kazakhstan Astanada Smart City zııatkerlik platformasyn qurý, Qazaqstandaǵy alǵashqy sýperkompıýterdi iske qosý jáne Alem.AI bazasynda ahýaldyq ortalyqty ashý boıynsha jobalardy iske asyrýda.
Sonymen qatar Qazaqstan men BAÁ kapıtal naryqtary arasyndaǵy yntymaqtastyq turaqty túrde belsendi damyp keledi. Emıtentter men ınvestorlar úshin ınvestısııalyq ortany qoljetimdi etý baǵytynda baılanystar nyǵaıyp jatyr.
Mysaly, bıylǵy 7 mamyrda Nasdaq Dubai bırjasy men Astana International Exchange (AIX) ózderiniń ortalyq depozıtarııleri arasynda tikeleı baılanysty iske qosqanyn habarlady. Bul baılanys arqyly qosarly lıstıngtegi baǵaly qaǵazdar boıynsha saýda-sattyq pen esep aıyrysýdy eki alańda da qamtamasyz etýge múmkindik beredi.
Buǵan deıin 2024 jyly AIX Abý-Dabı bırjasy (ADX) bırjalar arasyndaǵy saýda úshin qurǵan Tabadul sıfrlyq bırjalyq habyna qosylǵan edi. Sondaı-aq AIX-tiń saýda músheleri qatarynda Birikken Arab Ámirlikterinen International Securities, BHM Capital jáne Al Ramz Capital kompanııalary bar.
Sonymen qatar sáýir aıynda Eýrazııalyq damý banki AIX alańynda BAÁ dırhamynda oblıgasııalardyń debıýttik shyǵarylymyn sátti ornalastyryp, Qazaqstanda osy valıýtada oblıgasııa shyǵarǵan alǵashqy emıtent atandy.
