Jambyl aýdanynyń ákimi Nurlan Ertasulynyń aıtýynsha, aýdanda 1,5 mln-ǵa jýyq tórt túlik ósiriledi. Jalpy aýmaǵy 2 mln gektardy alyp jatqan aýdanda tólin ertken otar qoı, úıirli jylqy kózge jyly ushyraıdy. Erjan Qusaıynov jetekshilik etetin «Dáýithan» sharýa qojalyǵy bııazy júndi merınos qoıyn ósiredi. Ieliginde 2,5 myńdaı qoıdyń 1 400-i – saýlyq. 120 sıyr men 4 úıir jylqy da osynda. Mal qysta shalǵaıdaǵy jaıylymda, jazda Maıtóbe jaılaýynda baǵylady. Qaramaǵyndaǵy saýlyqtyń jartysynan astamy qozdap úlgeripti. Mejede ár saýlyqqa qozy ilestirý kózdelgen.
Malshylar turatyn baspana, otyn-sý, isher astan taryqpaıdy. Saqmanǵa kelgen agrarlyq ýnıversıtettiń bilimgerleri óndiristik tájirıbelerin osynda ótkizip jatyr.
«Úsh jyl aralyǵynda 300-deı stýdent óndiristik tájirıbeden ótti. Naýryz aıynan bastap mal tóldetý naýqanyna qatysyp jatyr» deıdi Qazaq ulttyq agrarlyq zertteý ýnıversıtetiniń ókili Baqytgúl Esimova.
Aq qoıdyń qozysyn qatarǵa qosý úshin mańdaıter tógiledi. Osyny túısingen stýdentterdiń qoı qozdatýdyń mashaqatyna moıynsunǵany baıqalady.
«Saqmanǵa kelgenimizge 10 kúnnen asty. Qoı tóldetip júrgenime qatarymnyń kóbi senbeıdi. Az ýaqytta qozylarǵa dári egip, quıryqtaryn kesýdi úırendik. Jańa týǵan qozynyń ishi ótse ózimiz dárileımiz. Túngi kezekke turamyz. Kúnige 5-10 qoı týady. Arasynda egizderi bolady», deıdi 3-kýrs stýdenti Janbolat Januzaq.
Mátibulaq aýyldyq okrýgine qarasty Qarabastaý aýylynyń turǵyny, kásipker Ashat Sákıevtiń sharýa qojalyǵynda 2 myńnan astam Edilbaı qoıy bar, onyń 1 600-i – saýlyq. Buǵan qosa, 60 bas iri qara, 2 úıir jylqy baǵyp otyr.
Úlgili aýyldyq okrýgine qarasty «Murynbaı» sharýa qojalyǵynyń ıesi Serik Nurymbaev mal ósirip qana qoımaı, malshylardyń áleýmettik jaǵdaıyn jaqsartyp, maldy-jandy bolýyna qamqorlyq tanytyp keledi. Búginde 3 200 bas Edilbaı qoıynyń 70 paıyzy tól ergizgen. Baǵymynda 50-ge jýyq iri qara men 200-den astam jylqy da bar. Irgeli sharýashylyqta mal dárigeri, mehanızator, kólik júrgizýshisi jáne qurylys sheberleri turaqty jumys isteıdi.
О́lkedegi 2 myńǵa jýyq sharýa qojalyq ósimdik sharýashylyǵy baǵytynda mamandanǵan. 106 myń gektarǵa jýyq egistiktiń 50 myńnan astamyna arpa, bıdaı, júgeri, suly syndy dándi daqyldar, 47 300 gektarǵa kópjyldyq shópter egiledi. Sebebi aýdanda 4 myńǵa jýyq sharýashylyq mal ósirýmen aınalysady. Soǵan qajetti jem-shóptiń 50 paıyzy osy kópjyldyq shópke baǵyttalǵan.
Almaty oblysy
