Temirhan aqyn týraly tebirenbeı sóılemeý múmkin emes. Esimi atalsa, kók túrikter saryny birge oıanady. Attan túsip qalǵandaı qazaq balasyna kún túbinen kók túrikter rýhyn ala kelgen shaıyr táýelsizdik tańy atqanyn ult poezııasynda tegeýrindi jyrlary arqyly tanytty. Sóz tanyǵandar Tonykók pen Temirhan egiz dep jazdy. Aqyn táýelsizdik jyldarynyń basynda «Kók túrikter saryny» jyrlaryn týdyrǵanǵa deıin de qazaq óleńiniń shoqtyǵy bıik ókili retinde baǵalandy. О́leń ólkesine oqshaý bitken jartastaı ordaly rýh kóterip kirgen oǵlan «Jumys kıimin» jamylyp, «Usta dúkeninde» kórikte balqyǵan temirdi tós ústinde naızaǵaıdaı aýnaqshytyp, qalaı bolsyn solaı ıgeni jyrsúıer qaýym jadynda. «Janymnyń japyraqtary» atty alǵashqy jınaǵynan bastap óle-ólgenshe qazaq rýhyna qyzmet etken rýh jarshysy Halyq jazýshysyna aınalǵany tekten tek emes.
1945 jyly Túrkistan oblysynda týǵan aqyn Sherhan Murtaza basshylyq etken tusta «Egemen Qazaqstan» gazetiniń Mańǵystaý oblysyndaǵy tilshisi qyzmetin atqaryp, namysqa sýarylǵan jyrlary arqyly ulttyq rýhtyń alaýyn jaqty. «Sapar aldynda», «Alys shaqyrymdar», «Mártebe», «Áýedegi tolqyndar», «Daýys», «Kógershin qaýyrsyndary», «Ańqa keptirgen ańyzaq», «Syrym bar saǵan aıtatyn», «Taǵdyrly jyldar jyrlary», «Kók túrikter saryny», III tomdyq «Tańdamaly jyr jınaǵy» sekildi jyr jınaqtarynyń, «Meniń Abaıym», «Baba dástúrdiń murageri kim?», «Segiz qyrly seksen syrly álem bul» atty syn kitaptary, «Tolǵaýy toqsan dúnıe» atty pýblısıstıkalyq oı-tolǵaýlar men esseler kitabynyń avtory qazaq halqymen máńgi jasaı bereri sózsiz.
«Egemen Qazaqstan» qalamgerleri
