Temirhan Medetbektiń shyǵarmashylyǵyn «Kók túrikter sarynyna» deıin jáne keıin dep ekige bólýge bolady. Tutas Turan tulǵa tutqan kók túrikter dúbirin bastamaı turyp, oǵan deıingi ózgeshe qoltańbasy da tegeýrindi edi.
Poezııa áleminde eki óris ashqan, ekeýi de ózgeshe álemge aınalǵan aqmańdaı aqyn tek Temirhan Medetbek qana!
Al Kúlteginniń kúmbirin, Tonykóktiń tolǵaýyn jańǵyrtqan kók túrikter saryny Temirhannyń túri ǵana emes, jyry da «egeýli naıza qolǵa alǵan» er Mahambetke keletinin dáleldeı tústi.
Temirhan jańa zamannyń Mahambeti edi.
Temirhan Medetbekterdiń tolqyny – soǵystan soń týǵan Jumataı, Keńshilik, Jarasqan, Járken bastaǵan aqyndar – óleńde ózderiniń ózgeshe óristerin ashqan daryndar. Bulardyń aldarynda Qasym, Syrbaı, Ábdilda, Iztaı, Qýandyqtardan keıin jarqyrap shyqqan alpysynshy jyldardaǵy altyn dáýirdiń aqyndary Muqaǵalı, Tólegen, Qadyr, Tumanbaı, Jumeken, Saǵılar turdy.
Temirhandardyń tolqynyna aldarynda asqaqtap turǵan osy daraboz aqyndardan daralaný ońaı bolǵan joq.
Temirhan Medetbekti el eń aldymen aqıqattyń aldaspany, shyndyq jyrshysy dep biledi. О́ıtkeni Temkeń jalǵan aıtqan emes. Bıliktiń shotyn shapqan emes. Qandaı da bir qoǵamdyq-saıası oqıǵalarda tek shyndyqty aıtty. Halyqtyń sózin sóıledi. Ádiletsizdikterdi ashyq aıyptady. Ár sóziniń qarymy atqan oqtaı, jalyny jaqqan ottaı, aryny shapqan attaı tereń de, kemel jyrlarymen aqıqattyń aıbaryn aıshyqtap, dáýir beınesin bederleı bildi.
Bıyl seksenniń seńgirine shyqqan kúni syrtta júrip, bara almaı, telefon arqyly sóılesip edik. О́zine arnap jazǵan maqalamdy oqyp, qatty rıza bolǵanyn aıtyp, qýanyp qalǵan edi. Únemi habarlasyp, qamqor bolyp júretin edi. Elý jasymdy el toılaǵanda Muhtar Shahanov, Dýlat Isabekov, Kópen Ámirbektermen birge shalǵaıdaǵy Shardaraǵa arnaıy at basyn tirep bardy. Qyzyldyń qumyndaǵy «Qyzylqum» aýylyndaǵy qarashańyraǵymyzda da bolyp, eldiń qurmetine bólenip, batasyn berdi.
Ádebıette artynan ergen búkil talantty jastarǵa qamqor boldy. Talanttardy tamyrshydaı tap basady. Anaý bir kezde ádebıetke toqsanynshy jyldary, qıyn kezeńde kelgen tegeýrindi tolqynǵa «Altynkópirlikter» dep at qoıyp, aıdar taǵyp, bir top aqynnyń shyǵarmashylyǵyn zerttep, aq batasyn bergeni belgili.
Ony kórgen saıyn aǵamyzdyń alpys jasyn toılaǵanymyz eske túsedi. Elýlerge deıin Mańǵystaýdyń mań dalasynda mańǵaz basyp júrgen Temirhan Almatyǵa kesh oraldy.
2005 jyly Ońtústikte rýhanııatqa janashyr qaıratker Islam Ábish bastaǵan azamattardyń nıetimen kıeli Túrkistanda Temirhan Medetbektiń alpys jasy dúrildep ótti. Almaty men Astanadan bir top áıgili qalamger bir vagon bolyp keldi. Bul mereıtoı jigit kezinde elden attanyp ketken Temirhan aqynnyń Túrkistanǵa túrki áleminiń tarlan aqyny bolyp oralǵan toıy boldy.
Qazaqtyń aldaspan aqyny qazaq halqymen birge máńgi jasaı beredi.
Temirhan týraly naǵyz sóz endi aıtylady.
Temirhan dáýiri bastalady.
Aqynyn ardaqtaǵan Alash jurtyna otbasy-áýletine kóńil aıtamyz.
Peıishte rýhy shalqı bergeı!
Qazybek ISA,
aqyn, Parlament Májilisiniń depýtaty
