Eń aldymen, adamgershiligi myqty adam edi. Barlyq dúnıege jany ashyp, áıteýir bolsa eken dep turatyn ǵajaıyp jan bolatyn. Bárimiz aıaýly aǵany osy bir kirshiksiz kóńili úshin, keń júrektigi úshin jaqsy kóretinbiz. Aǵamyz týraly kóp jaqsy áńgime aıtýǵa bolady. Degenmen, arda aqynnyń azamattyǵyn erekshe qurmetteımiz. Jazýshylar odaǵynyń hatshysy bolyp turǵanda da, basqa qyzmette júrgende de árqashan ar sózinen attaǵan joq, aqıqatynan aınyǵan joq. Ádebıetke eshqandaı bir jeke múddesiz shynymen jany ashıtyn, qaı sátte de óziniń azamattyq pikirin aıta aldy. Talanttarǵa qamqor, ónegesi kóp, bolmysy bólek adam edi. Qaı istiń basyna barsa da jaýapkershilikpen, azamattyq kózqaraspen qarady. Keıingi jastarǵa da jyly sózin kóp arnady. Aǵa býynnyń aqyndyq sheberligi men azamattyq kelbetine keıingi býyn – biz, árdaıym súısinip óttik. Temirhan aqyn Mańǵystaýda júrip oqyrmanǵa keńinen tanyldy. Sonda ádebıetsúıer jurttyń japa-tarmaǵaı oqyǵan avtory Temirhan Medetbek boldy. О́zimiz de shyǵarmalaryn oqyp óstik. Erekshe syıladyq. Árıne, kóz aldymyzda júrgen aıaýly jandy kim ólimge qısyn? Qımaımyz. Dese de arda azamattyń ýaqyty kelgen eken. Qaıtalanbaıtyn talantty aqyn, jany izgi adam edi. Ol kisiniń esimin bar qazaq umytpaıdy.
Meıirhan AQDÁÝLETULY,
aqyn
