ASTANA. 20 maýsym. Almatynyń Almaly aýdany «Tastaq» shaǵyn aýdanyndaǵy aýlalardyń birinde 5 avtokólik órtenip ketti. Bul týraly qalalyq tótenshe jaǵdaılar departamentiniń baspasóz qyzmeti habarlady.
Tótenshe jaǵdaı atalǵan shaǵyn aýdannyń Dúısenov kóshesindegi 100-úıdiń aýlasynda boldy. О́rt týraly aqpar tańǵy saǵat 4:30-da kelip túsken. Ony óshirý úshin 2 tehnıka birligi men 13 qyzmetker jumyldyryldy. Tilsiz jaý 32 mınýttan keıin tolyq sóndirildi.
Apat saldarynan zardap shekkender joq. Otqa oranǵan Mitsubishi Pajero, Lada Samara, Honda CR-V, Chrysler 300 jáne Toyota kólikteri múldem jaramsyz bolyp qaldy.
Kýágerlerdiń aıtýynsha, Chrysler kóliginen órt shyqqan kezde, onyń qasynda birneshe jas jigit eregisip turǵan. Keıin qyzyl jalyn lezde janyndaǵy basqa kólikterdi de sharpyp úlgeredi.
Elaman Qońyr.
Derek: Almaty qalalyq tótenshe jaǵdaılar departamentiniń baspasóz qyzmeti.
Sýret: tengrinews.kz.
