Azamat S.Asfendııarov atyndaǵy medısına ýnıversıtetiniń túlegi. Astanaǵa kelgen soń birden №8 qalalyq emhanaǵa ýrolog bolyp jumysqa ornalasqan. Sodan beri ujymda taban aýdarmaı eńbek etip keledi. Syrqattar da dárigerin jaqsy tanıdy. Qabyldaýǵa 8.00-den bastap 14.00-ge deıin keledi. Sebebi, dáriger tústen keıin jeke emhanada jumys isteıdi. Astana qalasynyń eńbekqor dárigerlerine mundaı jumys rejimi tańsyq emes. Suranys bolsa, bos ýaqytqa jumys tabylsa, dárigerler qarap jatpaıdy. Jumys rejiminiń tyǵyzdyǵyna qaramastan, Azamat burynnan tanys bolyp qalǵan aýrý-syrqaýlarmen telefon arqyly da baılanysyp, keńesin aıtyp otyrýdan jalyqpaıdy.
A.Jumashev qazir ýrologııalyq máselelermen keletin pasıentterdiń kóbeıgenin aıtady. Aýrýlardyń kóbi gormon jetispeýinen bastalady. Qıyny, keıde taldaýlarda jaǵdaı qalypty dep kórsetkenimen, shyn máninde, ahýal jaqsy bola bermeýi de múmkin. Aıtalyq, siz sportpen shuǵyldanyp, belsendi ómir súresiz delik. Odan keıin jumysqa baryp, jumystan soń taǵy birer jerge aıańdap, tún jarymǵa deıin júrseńiz sizge gormon jetpeıdi, sharshaısyz. Mysaly, qýyq asty beziniń aýrýyna ınfeksııa juqtyryp, sýyq tıgizgenge qaraǵanda gormonnyń jetispeýinen shaldyǵatyndar kóp. Dárigerler aýrý-syrqaýdyń barlyq túri ózimizdiń ómir súrý qaǵıdamyzǵa, tamaqtaný tártibimizge, salamatty ómir saltyn ustanýymyzǵa baılanysty ekenin aıtady. Onyń ishinde testosteron tómendeýi bar. Ýrologııalyq aýrýlar jastarda kóbine osy testosteron jetispegennen paıda bolady.
– Salamatty ómir salty, tártip, jiger, kóńil kúı, sergektik taǵysyn-taǵy testosteronǵa áser etetin nárse kóp. Bul – jahandyq másele. Emdeýge kelgende durys qadam kerek. Qymbat quraldardyń múmkindigin paıdalanǵan durys. Áli de bolsa salanyń aqsap turǵan tustaryn jetildirý kerek. Qan quramyndaǵy gormondardy dál anyqtaý qajet. Ýrologııada densaýlyq jaǵdaıyn dál anyqtaıtyn ádis-tásilderdi qoldansa, jaǵdaı birshama jaqsarady. Biz óz deńgeıimizde, múmkindigimizge qaraı medısınalyq kómek kórsetemiz. О́zim kúndelikti 12-15 adam qabyldap úlgeremin, – deıdi A.Jumashev.
Talaı jyldan beri bir emhanada naýqastardy qabyldap, tıisti emsharasyn usynyp júrgen Azamat Jumashevti arnaıy izdep keletinder kóp. Byltyr ýrolog dáriger «Salamatty Qazaqstan» medısınalyq poıyzynyń quramynda bolyp, aýyl-aımaqtaǵy aǵaıynǵa medısınalyq kómek kórsetti. Shalǵaıda turatyn, medısınalyq tekserýden ótpegen turǵyndardyń alǵysyn aldy. Segiz aı saparda óńirlerdiń ahýalyn kórip-bilip, zerdelep kelip, jyl basynda qalalyq emhanadaǵy jumysyna qaıta kiristi. Eńbekke adal, syrqattarǵa janashyr A.Jumashev medısınalyq poıyzda júrip jıǵan tájirıbesi aldaǵy jumysyna azyq bolatynyna senimdi.
