Atyraýda sý men káriz baǵasy qymbattady

ATYRAÝ. 3 tamyz. Atyraýda 1 tamyzdan bastap sý jáne káriz tarıfiniń baǵasy qymbattady. Bul týraly egemen.kz tilshisi habarlady. Atyraý qalasyn sýmen qamtamasyz etetin «Atyraý sý arnasy» kommýnaldyq memlekettik kásipornynyń tarıfti ósirý jónindegi usynysy Tabıǵı monopolııalardy retteý jáne básekelestikti qorǵaý departamenti tarapynan qoldaý tapty. Atalǵan departament basshysynyń orynbasary Álseıit Sabyrovtyń málim etýinshe, budan bylaı jeke tulǵalar sýdyń bir tekshe metri úshin 101 teńge 33 tıyn tóleıtin boldy. Buryn bul baǵa 68 teńge 28 tıyn edi. Al zańdy tulǵalarǵa bir tekshe metr sýdy paıdalanǵany úshin tarıf quny endi 316 teńge 72 tıyndy quramaq. Bul baǵa osy kezge deıin 189 teńge 7 tıyn deńgeıinde saqtalyp kelgen bolatyn. «Atyraý sý arnasy» basshylary tarıftiń qymbattaýyna birneshe sebepti alǵa tartyp otyr. Birinshiden, kásiporyn shyǵyny kóbeıgen bolsa, ekinshiden, qajetti materıaldar men hımııalyq reagentter baǵalarynyń ósýi áser etken. Úshinshiden, sý tarıfterin qalyptastyrýdyń jańa tetikterin engizýge baılanysty keshendi jospardy júzege asyrý qajettigi týyndapty. Tórtinshiden, kásiporynnyń ınvestısııalyq baǵdarlamasyn iske asyrý kózdelipti. Sonymen birge, Atyraýda káriz júıesi tarıfi de qymbattady. Endi atyraýlyq jeke tulǵalar bir tekshe metrge 35 teńgeden, al ózge tutynýshylar 151 teńge 98 tıyn tóleýge májbúr bolady. Bul qyzmetke tólenetin baǵa buryn tıisinshe, 31 teńge 39 tıyn jáne 122 teńge 12 tıyn bolǵan edi. Joldasbek Shópeǵul. Derek: egemen.kz. Sýret: dknews.kz.